ADVERTISEMENT

This area is available for advertisement. Please contact for details.

Arnivang
Get Adobe Flash player

Guwahati HC atum CBI aphan katarlip arpu kepek aphuthak kurvangthu: KMSS

Louis Burger kecho panglim

GUWAHATI, Chiti 2: Guwahati high court atum Chiti niphai 1 arni Louis burger kecho kapanglim aphuthak CBI atum aphan arpu kepek aphuthak Krishak Mukti Sangram Samity (KMSS) atum kurvangthu pajirsi deng lo. Louis burger kecho panglim aphuthak kachesong la henlo kethenai asai chunpo pusi KMSS atum ning chepathe. Laso kecho kapanglim along honthe meme kecho panglim ateipo minister Dr. Himanta Biswa Sarma ta non ephongke jokje lo puta KMSS ning the. Pachetak aloh pen Gana Mukti Sangram Assam convenor Akhil Gogoi, KMSS a meiphu Raju Bora, joint secretary Mukut Deka lapen Dharjya Kunwar atum kapangdak ateng ke, Sarbananda Sonowal kachari BJP ratpangri atum joi- joi bidi klem pusetame Guwahati high court atum international angdeng along India aphan aman kejor labangso kethedung kecho panglim aphuthak kiri katarlipji aphan CBI atum aphan arpu kepek lake choro vek nangji. Laso kecho kapanglim aphuthak tarlip nangji pu kedamtang arni Guwahati high court along rat apharman KMSS abarim  organising secretary Bhaben Handique kachoningri ateng pen high court atum laso asai kedeng aphuthak Handique aphan choro lo.
Pinpurme Kedamtang Congress kachari ahut BJP atum Dr. Himanta Biswa Sarma louis burger kecho panglim along kacherap do pusi pachethang lo. Bonta Himanta Biswa Sarma BJP along dunjui aphi penke Sonowal kechari ratpangri atum adai kedo Himanta Biswa Sarma aphan kaprek-kaprek atovar pen rai dun bomlo. Kedamtang ningkan hini kiri katarlipji aphan arpu kepek CID atum katarlip patu joi pusi Guwahati high court atum ning kangsamse chepaklang lo. Kecho kapanglim aphuthak echet ta pado longle pu Sonowal kachari BJP ratpangri atum Himanta Biswa Sarma aphan kapajok dunji aphan alangli kachemenai police asaiphu Indrani Baruah aphan CID along kerai dunji aphan arpu kepek puta alamki klang. Kedamtang aningkan Chiti niphai 26 arni America Department of justice atum louis burger kecho kapanglim aphuthak aloh (document)  heihui nang en noi pusi Assam CID atum aphan America an pha lo setame kedamtang ningkan isi aprang pen CID atum patheng- pathong pen halabangso aloh en damde det lo. CID atum asai kacheklem kapangkre honthe meme kedokok ajoksi Guwahati high court atum puthot CBI atum aphansi arpu kepek lake thedung asai kedeng lo puta jong dam me.  Assam ratpangri atum labangso kecho panglim alamhoi aphuthak high court atum CBI arideng kapapi longle detji aphanta avarsai klemsi Assam ratpangri advocate general dokok aphita Assam along ador keso-keso jung- jung advocate atum aphan chetoi lo. Ajat setame kecho kepanglim aphuthak kekhamkhe atum ratpangri alan ingsek daksi Guwahati high court atum  ingthirjir pen CBI atum aphan katarlipji aphan hokum kipi aphuthak kecho kepanglim aphuthak kekhamkhe Assam arlo kado kave abangphu bangphi atum ning kangsam chepaklang. Halapu KMSS atum angsong angdeng asongja lapen kacherap dun do-an atum aphan laso kecho kapanglim katarlip along Guwahati high court atum kelang chari dun kenangsot pusi KMSS atum hang.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives