ADVERTISEMENT

This area is available for advertisement. Please contact for details.

Arnivang
Get Adobe Flash player

Pherangke pulote gyan apuru si cheman nangji: Longsing Teron

UntitledDiphu, Paipai 31: District Press Club of Karbi Anglong lapen Assam Sports Journalist Association atum chelangsi pini Diphu Agriculture Farmers Growth Centre along Journalism aphuthak arnisi asaikulat paman.
DPCKA ameiphu Kiri Ronghang kachepahemphu amai along sankur chunbang Danielson Bey pensi alohi kapachini apor en. Mai along alohi sarpo aman pen KAAC UntitledEM Raju Tisso chetong dun. Manpeng alohi aman pen JAFA state ameiphu Thekar chapbang Longsing Teron, abarim pherangke lapen tokbang Pobitra Bora chetong dun. Phapangjang aman pen DPCKA bidisar Sonju Bora atum anparta Karbi Tokbang a Terank a chunbang lapen KAJU ameiphu Joysing Tokbi, News Live Karbi Anglong Bureau Prodip Nath atum chetong dun.
ASJA pen saikulat along lam kethanji aphan Sports Journalist Federation of India lapen Assam ameiphu Subodh Malla Barua, Rtd Programme Head PPC NorthEast Rupendra Narayan Bora, ASJA dun meiphu Jugal Lochan Das, nong kachethang klong mohor kenep thek abangphu Samsul H. Patgiri cheton dun. Alangli ahin pen rat asai klembang Bishnu Ram Nunisa ta saikulat along do.
Saimek ateng alohi sarpo KAAC EM Raju Tisso pen pherangke atum akenangsot lapen pherangke atum keklem kedam nangji alamthe lapen kithurmi Pherangke atum penang ale longpo puta jaisi arnisi apharman kibi saikulat ingpu lo.
EM Raju Tisso ingpu det aphi, JAFA state ameiphu Thekar chapbang Longsing Teron pen kopuson pherangke atum kachepareng dun thekji aphuthak, keklem bom pherangke atum knowledge apuru cheman un nangji, methang a profession keklem nangji a-ot adur chechini akenangsot, anparta pherangke atum cheharhak thek lote akangtui angdeng anta ledun po. Hamphang kachingthur along pherangke akerap thedung akerap do. Pherangke atum methang asai keklem kedam kachini akenangsot. Ongdung Pherangke atumke aron atang kachinine pen keklem kedam thap ta kave det kali.
Keklem bom apherangke atum kitap kaporhipikji aphan ning aklong pen senior journalist Pabitra Bora choningri. Lasonsi mohor kenep aphuthak ta than pajirmi dam, methang chepadukde te akangtui angdeng an chepale dun un-eh, lasi methang ethic chechini nangji puta Bora jai.
Laso aphi ASJA atum pen chepatirpisi sai angdeng ensi bangpli atum pen sonpli athepi aphuthak than lo. Laso ahut Sports Journalist Federation of India lapen Assam ameiphu Subodh Malla Barua pen ‘Sports Journalism lapen Journalism’ aphuthak than. Rupendra Narayan Bora pen ‘Television Journalism’, Jugal Lochan Das pen Sports Journalism lapen kaprek kaprek aphuthak than, anparta Samsul H. Patgiri pen Photo Journalism as a Career pu aphuthak than. Laso ahut alangli pen kenep tang amohor heihui ta saikulat along paklang lapen kopusonsi mohor kenep nangji anparta mohor kenep thekser pulote methang aso asu kachalana aphanta mesen avarsai kelongji aphuthak than.
Saikulat along chethan chimun pen aphi kacharju a session padolo, laso ahut ajahak Karbi Anglong arlo kedo a pherangke atum pen penang an alam arju dun. Karju dun alam ateng ASJA atum pensi alamthak pilo. Saikulat kapajut ahut kado kave kachetong dun atum aphan certificate pakni ron lo.
Laso aphi Ashabul Rahman pen kacharo alamthe pajir, arnisi apharman kapado ‘Journalism’ aphuthak asaikulat pajut lo.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives