ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Customary kapathirji aphan Karbi alam pen English larsi governor along pon po: CEM

‘Manim’ ningkan hini kepleng katalon

UntitledDiphu, Paipai 26: Pini Diphu Lorulangso Rangsina Sarpo Cultural Hall along Karbi Tokbang Aterank ningkan hini ra chiklo jon 8 kepleng lapen Karbi Tokbang Aterank pen kapaklang ‘Manim’ ningkan hini kepleng talon.
KTT ameiphu Bidyasing Rongpi kachepahemphu amai along chunbang Joysing Tokbi mai kepha alamthe kejai lapen alohi kapachini apor en. Mai along alohi sarpo aman pen Karbi Anglong Autonomous Council a CEM Tuliram Ronghang Ronghang chetong dun. Mai along KAAC EM atum Kache Rongpipi, Prodip Rongpi, Rupsing Teron lapen Amarsing Tisso lapen MAC Untitledatum Mongal Sing Timung pen Darsing Ronghang, KCS ameiphu Chandra Sing Kro, Manim anong-eh Karbi aron aloh pu akitap ketok abangphu HMA ameiphu Lunse Timung, KLA ameiphu Suren Kramsa lapen kaprek-kaprek atum chetong dun.
Karbi bhajan kilun pensi sai angdeng pangcheng lo. Laso aphi KTT chunbang Joysing Tokbi Karbi Tokbang Aterank ningkan hini angbong keklem kedamtang aphuthak lamjai pi lo.
Laso aphi kedamtang arni temoso ketok kachepate along kehai abangphu On Teron aphan pen chenglok Manim alamsai along kaprek-kaprek aphuthak ketok dun atum aphan nong-eh pajir.
HMA ameiphu lammet kuru Lunse Timung aphan ‘Manim’ lamsai anong-eh pajir lo. Laso anong-eh along certificate, memento, ningkachingsam angthek Karbi choihongthor, poho lapen tangka kereng sika 10,000 pajir lo.
Nong-eh dengdet aphi alangli mai along lamthe kejai ke, Karbi akhei ajutang pareng nangji lapen Karbi ta khei kangthim pu chipuji pulote aron atang kedo kenangsot. Lasi Karbi Customary Law ardi pinangji’. Laso aphuthak Karbi Anglong Autonomous Council atum EC amai along kacherai chot kali, session along ta cheraisi governor aphan padeng nangji pusi alangli choningri.
Manim lamsai anong-eh kipi apot HMA ameiphu Lunse Timung Karbi Tokbang Aterank atum aphan kachoro pajir lapen KTT achethe pading nang pu ahirjume hangpi.
Mai along kachetong dun KLA ameiphu Suren Kramsa, KCS ameiphu Chandra Sing Kro, Karbi Anglong Sahitya Sabha ameiphu Pari Rongpi lapen kaprek-kaprek atum pen Karbi Tokbang Aterank atum aphan choro lapen KTT kedo ajoine ove kimi tokbang atum loh ketok mesen adim long rinti lo. Laso ajoine ove kimi atum loh ketok anatthu penang an paprang dun lo.
Customary law kapathirji aphan EC along cherai etlo lapen Karbi alam pen English kelarji aphanta isi amei seng etlo. Lasi kado kave asai tang lote council session along cheparaisi governor along kapadengji aphan pon po pusi alohi sarpo aman pen kachetong dun KAAC CEM Tuliram Ronghang than.
KTT atum aphan Karbi Anglong Autonomous Council kaparlo asaikam tin pen ta advertisement papi ver po, la-an chot kali KTA atum aphan aningkan vang ta government of Assam lapen KAAC penta tangka kerap pidunver po pusi chechak tekang. La-an chot kali longle kepekji aphan ta CEM Tuliram Ronghang pini amai along chechak tekang.
Mai pajutje aprang literary award kelong dun Bidorsing Kro lapen Artist award kelong dun abangphu Joysing Rongpi atum aphan archo lo. Lasi aphi chungbang Joysing Tokbi kacharo alamthe pajirsi mai pachekak lo.

One Response to Karbi Customary kapathirji aphan Karbi alam pen English larsi governor along pon po: CEM

Leave a Reply

Your email address will not be published. Required fields are marked *

August 2017
M T W T F S S
« Jul   Sep »
 123456
78910111213
14151617181920
21222324252627
28293031  
Archives