ADVERTISEMENT

This area is available for advertisement. Please contact for details.

Arnivang
Get Adobe Flash player

Justice Ajit Singh arideng pen Diphu Judiciary Court ahem kangpu

UntitledDiphu, Paipai 12: Karbi Anglong arongsopi Diphu along pini Bhomti arni Gauhati High Court a Chief Justice Ajit Singh arideng pen Diphu Judiciary Court ahem (Building) kangpu.
District hini, Karbi Anglong pen West Karbi Anglong arat atum kisung alam kachethan damji lapen ahok akangsai kelongji aphan pini Diphu Police Reserve adung kedo Agriculture colony along judicial court ahem ingpu lo.
Kangpu ahut Gauhati High Court Chief Justice Ajit Singh kejai ke, “Assam judiciary atum pini aphurkimo asonsi Karbi Anglong district along kangsai ahin arni kimi tur lo. UntitledKedamtang penang arni aprang Dima Hasao district along inpu det aphi pini Karbi Anglong district along kangpu thulong apot neli ning arong lo”.
Assam arlo kethom inglong a district angbong pen pini anke hini kejokvan judiciary ingpu long lo. Lason thakthak West Karbi Anglong along ta kangpu longji aphansi netum matha bom lo puta alangli jai.
Kedamtang arni Karbi Anglong arlo judiciary lapen executive elongvet Deputy Commissioner asaihem alongsi do rappet lo. Halaso ahut judiciary lapen executive kacheprekpre det ajoine DC pen magistrate atumsi district administrator asonsi  klem lo.
Justice Singh kejai thuke, ‘non kejokvan judiciary kedo pen sankur arat atum judiciary lapen executive angbong kacheprek alam chini long po. Kedamtang arni anke kacharvo alam aphuthak kangsai lapen district kelangchari asai ta isivet atumsi klem lo’.
Kejokvan judiciary kapangni ajok kevangji arni pen ke kadure det arat atum ta ahok akangsai long po. Lasi rat atum ahok akangsai kelongji aphan ladaksi nang chepachong nang po puta chief justice jai.
Ason among chokpek aphisi pini laso a court ingpu lo. Lasi asontin aphuthak ta ahokpet akangsai kipi unji aphan ajakong dolo. Rat atum judiciary aphan ning chethe nang po. Laso aning kethe atengsi judicial atum pen ahok akangsai pisi kadure det arat atum ale long po puta justice Singh jai choningri.
Kaphere, kahonthe avepinsi rat atum judciary along vang nang po. Laso atengsi kelong nangji ajakong nang rai dun thek po puta langli jai.
Justice Singh kangpu amelur kaisi judicial court ahem ta ingpu lo. Laso aprang portfolio judge, Karbi Anglong Alfaz Ali kejai ke, ‘Democracy aron ateng kachari adet along kaiket kethom kenangsot anujok legislative, executive lapen judiciary do. Akaprek lapen kajokvan judiciary kedo pen monit atum aning kiduk alam arju abang do po’.
Judge incharge, administrative department, Guahati High Court Hrishikesh Roy kejai ke, Karbi Anglong arat atum ajirdingklui pen kachonghong ason pini anke pleng lo. Pinpurme, Dr. Jayanta Rongpi MP kikhi bom ahutsi akaprek judicial court kenangji aphan chingki-chethan tekang lo. Laso ateng non ningkan 26 aphisi laso akehang chun lo. Mai along kachetong dun judicial staff lapen advocates atum aphan alangli kethan tekang ke, judiciary lapen executive ke cheprekdak khangjang. Lasi kevangji arni kado kave atum chini long po.
Karbi Anglong aphan ke isi phurkimo asonsi man po, athe Karbi Anglong arlo judiciary asai cheng lo pusi Karbi Anglong a deputy commissioner Adil Khan jai. Rat atum aningduk alam kachethan ateng prapjin pen lamthak chelong po. Pini pen ke ne saihem along along kedo judge room anke ingthai dang po puta DC Khan pinpur.
Karbi Anglong District & Sessions Judge Amiruddin Ahmed, Nagaon District & Sessions Judge Rita Kar, Karbi Anglong S.P Dr. G.V. Siva Prasad, MP barim Dr. Jayanta Rongpi, minister barim Holiram Terang lapen Nagaon pen Golaghat a judge atum ta mai along chetong dun.

Leave a Reply

Your email address will not be published. Required fields are marked *

August 2017
M T W T F S S
« Jul    
 123456
78910111213
14151617181920
21222324252627
28293031  
Archives