ADVERTISEMENT

This area is available for advertisement. Please contact for details.

Arnivang
Get Adobe Flash player

Greater Diphu Water Supply Scheme kopisi tangte det?

Penang arni aprang akehai Rihon Daimary, PHE amontri Diphu nanghumri lo. PHE asaikam kedeng ajaimek heihui ko-an kichun-kichunche kachiniji aphansi Daimary asangho kevang pusi lam chini dun long lo. Public Health Engineering (PHE) ke Karbi Anglong Autonomous Council pensi pangri ponbom. Jaimek kedeng,tangka kipi lapen keklem kapachun anta KAAC si klem bom lo. PHE asaikam along KAAC pen kedeng ajaimek do-o, keklem ta do-olo. Karbi Anglong rongsopi pen rongsoso atok ano anta PHE sai kedeng angthek thek long-o. Bonta ahok pet alam abang ke PHE asaikam pen keklem rat atum aphan kijun alang keron asai kichunlim pu kethek long adim ing-arpik. Jaimek kedeng lapen keklem ke dopik, seta PHE kipi alang kijun pen kachosok dunlong atum aphai ing-arpik. Karbi Anglong rong ko-an aratsi PHE pen kipi alang kijun long lo ma ke ilitum hijan charjuje pinta chini lo. Puthot rat aphan kijun alang kipiji aphan PHE asaikam pen jaimek ko-an lo kedeng pen tangka kuti ko-an lo kapadam charjuje pinta ongdung cheroktok atum chini lo. KAAC ratpangri anghoi kangni atum lapen PHE asaikam asaiphu atum kapaklang ateng pulote kijumnei seta phant 50 anbak heihui arong ke kijun alang minta nangne pin nang po apot lo. Bonta asaimek ke deng lo, saimek kapachun aphan tangka pilo lapen saimek kapachun aphan ta (payment) pi etlo. Bonta rat  atum ke alang abang ke jun longle. Karbi Anglong arongsopi Diphu alam mathadam meme binong. Diphu rongsopi PHE asaikam pen kipi alang rongsopi phant 80 amekar atum jundun longlelang. Kaprek-kaprek arongsopi along heihui ke ingchin alangpong pen keron alang (Piped water supply) avarsai do-et. Bonta Diphu ason isi arongsopi kethe-kiding atum kedo et adim pini arni anta lason avarsai kipi thekthe ke ko-an therak meme alam lo. Diphu rongsopi aphan KAAC, Assam sorkar lapen central sorkar thangnat asaimek (Scheme) deng ponpe langma pu arju hurtha. Alamvoi ke lahelo. 2008-2009 aningkan rongsopi armu nangkebatbom lapen kijun alang kadure alam chinisi sika kuti 26 anbak rongsopi lang kapadorplupji aphan central sorkar tangka nanglo lo. Bangso ajaimek aphan Greater Diphu Water Supply Scheme pusi amen irlo. Parno dam nangkok, halabangso aningkan non Diphu a MLA Sar. Sum Ronghang si EM PHE arpu cherai lo. Bangso asai kapachunji aphan contract ke akehai Amarjit Ronghang pen Lunsing Teron atum aphansi pilo. Bonta keklem nangji aron ateng kalidet pura sika kuti 8 running bill pidet aphi asai abang pangtonkok lo. Bangso ajok  ningkan kep aphi ta asai patang thekthedet amat rongsopi arat lang kisung katora phonang veret. Kachini dun atengke bangso aronre pen sika kuti 8 kacho-en aphuthak kacheroktok inut-bang hini akorte atum Guwahati High Court along lam kosor dam lo lapen bisardar atum alamhoi kangsaiji aphan deng lo. Bangso alamhoi ke PIL NO.75 pusi chini dun. Alam hoi aphuthak kangsai konentu tong kapijut pone puthekthedet athema bisar akong telong ke kachetevar inglenhui (the wheel of law is slow to turn). Bonta  isi kamanghu meme pik alam abang ke Diphu rongsopi ason kethek-kere atum ked-o adim lason akuti-kuti rat atangka kechophalangno aphuthak karju dun lapen kipu dun atum nangklangkle. Rat  atum ningkreng apor lote lang kelong kisung hangjo ta bangso alam aphuthak karju dun atum ave. Athema, arni kachongdat chot atumsi lang ta kelong sungchot. Keplang-kephi pen arleng kethe atum ke ahem along langtuk dorep lapen motor pen langsansi angkro along lang plengtir minta nangne. Bangso apotsi  kethek-kere, keplang atum bangso alam chejok dun pen angho chepaharjak dun ingtungtedet lo tahai. PHE asaikam along aronre pen tangka kachopanglim atum aphan sodak pen ingsaiji pu montri Daimary asangho alamchak chepeplengji ma koson ma lale cholangding lonang.

Leave a Reply

Your email address will not be published. Required fields are marked *

August 2017
M T W T F S S
« Jul   Sep »
 123456
78910111213
14151617181920
21222324252627
28293031  
Archives