ADVERTISEMENT

This area is available for advertisement. Please contact for details.

Arnivang
Get Adobe Flash player

AUDC kahuri sai alamki kapajut

Ongdung ST loh charli osomar aphan amen kethapji aphan PVC lamchak kipi

DIPHU, Paipai 10: Assam University Diphu Campus men kethap along ST aphan kerai anghoi kapajumhek pu ajok Karbi Students’ Union (KSU) atum Paipai 8 arni kachesong asai dengsi kachesong kapachun vekji aphan AUDC a gate inghap chek lo.
Laso aphi kachesong ni thom kepleng arni Assam University, Silchar a VC pen kapinkhat ateng AUDC a PVC pen George Timung kejalin KSU lapen kacherapdun asong atum aphan mai kangnilinji aphan pha lo.
Pinpurme, atumi KSU atum kachesong ni ni kepleng arni Karbi Anglong arlo kedo hamphang asong, HTL, KSYC atum pen chenglok kaprek-kaprek asong atum kachedon dun angthek chepaklangsi kachesong along cheto dun lo.
Kachesong aphi ong ardi kedo-ong ajoine Assam University Silchar a Vice Chancellor Prof. (Dr.) Dilip Kumar Nath kapinkhat ateng AUDC PVC pen KSU atum aphan phasi mai ingnilin lo. Laso amai along vice chancellor kapinkhat ateng PVC pen Thekar chapbang Longsing Teron aphan ta special invitee aman pen mediator kedo dunji aphan mai along pha lo. Laso amai along AUDCSU, KSYC, AIKSU lapen AUDC along kedo-an asaikam HoD atum ta chetong dun.
Mai along penang an ajir kiding chingki-chethan det aphi hin-hin angbong pachetonsi KSU atum kehang ateng AUDC along kedo ajahak asaikam along ongdung ladak kedo ST loh charli osomar atum aphan ongdung amen kethapji aphan AUDC Pro Vice Chancelllor kado kave athengno chechak lo. Laso pen aphi kithirklong (Permanent) laso akisung kapakakji aphan ta chingvai lapen isi committee kesengji aphan ta cherai.
Assam University a vice chancellor pen AUDC Pro Vice Chancellor aphan birta kapachini ateng Thekar chapbang Longsing Teron aphan Assam University a Executive Council along member kepon pen AUDC along kapalang dunji alam ta mai along PVC Prof. Dabasis Biswas pangdak lo lapen ingsamjin pen kachingvai kapajut thek along Longsing Teron kacherap dun apot ta AU a VC lapen AUDC a PVC pen alangliphan kurvangthu pi pen kachoro pajir.

Leave a Reply

Your email address will not be published. Required fields are marked *

August 2017
M T W T F S S
« Jul    
 123456
78910111213
14151617181920
21222324252627
28293031  
Archives