ADVERTISEMENT

This area is available for advertisement. Please contact for details.

Arnivang
Get Adobe Flash player

Nihang nirep anta temon charting Mora nangkele, ongdung hem kaphalangno

Cylone Mora: Karbi Anglong alongri pangting klak

Diphu-Manja atovar, NH36 along thengpi kekrep lapen Hidipi along hem kanahok

UntitledCyclone Mora atemon kejap ajakong kethe ajok Manipur ahavar Chandel alongri arlo thengpi kepur ajok hem rit kanahok.DIPHU, Aru 30: Bangladesh adet pen kevang temon charting Mora kevang Karbi Anglong alongri anta nang kejap. Adap porphai 6 pen kecheng arnikangsam apor ansi laso temon charting Karbi Anglong nangkele. Karbi Anglong ahempi Diphu rongsopi arlo Rongkhelan, DIG bunglow adung tovarpi along thengpi kekrep ajok penang apor kedam-kevang tora lo. Lasonsi NH 36 kacheleng atovar alom ta penang an athengpi kekrep ajok kedam kevang tora lo. Birta ketok apor ahut anke kithi-kejang lapen areng keso abirta arju long dunde lang, seta penang ahem ting ke-oi lapen thengpi kekrep dolo. Temon charting kevang ajok Diphu rongsopi arlo rihing ameh anta ave lapso pangting klak lo.
Borjan constituency angkang ta Hidipi ahithi along penang an hem rit nahok dun. Laso temon kethe kejap ahut hithi anglum kedo kethenai athengpi kekrep ajoksi hem nahok dun. Kisung kepho alam karju long pen 21 Borjan constituency angkang BJP pen kachotoi dun abangphu Longki Timung humri damsi kisung kephovek atum aphan kerap piji pusi lamchak chipi tekang.
Temon charting mora pini arni nihangnirep ta nangkele kejap tirlap. Laso atemon thepi Chittagong arongsopi Bangladesh along todap porphai 6 pen kejap aphi anerlo apor si nihang nirep ahavar japlo.
Pini arnikangsam apor Meteorological asaikam pen pangdak birta atengke laso atemon thepi nihang nirep anat nangjapbom vangbom pen temon charting ajur nangpi bom vangbomji pusi pangdak.
Nihang nirep ahavar Assam, Meghalaya, Arunachal Pradesh, Mizoram, Nagaland, Tripura lapen Manipur alongri along Cyclone Mora ajoine hem rit kanahok lapen kachemerek kedoji aphan pachetak.
Laso temon arve kethe pik ajok Mizoram along hum 80 sose ahem kanahok dun lapen Siaha along district hospital nahok dun.
Birta kelongdun atengke, state nitur anat rihing ameh pen telecommunication kaheno ajok aphai lakha longle lang pusi pangdak.
Nelitum kachini atengke Champhai district Khawbung pu arong along hum 20 ahem kanahok abirta long pusi inut government asaikhi ningje.
Met asaikam pen pangdak atengke laso atemon arve Thelang arni northeast ahavar anat jap si alang pu. 45-80kmph atemon nitur Assam, Mizoram, Tripura, Meghalaya and Manipur jap bomji pusi pangdak.
Hem rit kanahok dun atum aphan boha thik pilo pusi chari atum pangdak lapen penap ta laso temon charting nangle thu alang lasi kachere dunji aphan pangdak.

Leave a Reply

Your email address will not be published. Required fields are marked *

Archives