ADVERTISEMENT

This area is available for advertisement. Please contact for details.

Arnivang
Get Adobe Flash player

Kapaphihup atum apharman Niso Terangpi songve pen kilik chedan dunpo

UntitledDiphu, Aru 16: Non kevangji Karbi Anglong Autonomous Council kilik along 19 Dhansiri MAC constituency along songve pen Niso Terangpi kilik chedan dunpo pusi pini Rural Aids Society (RAS) asaihem along mai kangni ahut pangdak.
Songve pen Niso Terangpi kilik chedan dunpo pu kapangdak amai Lawrence Rongpi si chepehemphu, mai along Bharat Ronghang si mai kepha alamthe kejai lapen alohi kapachini apor en.
UntitledMai along songve apharman kilik kapachethang amei a bidisar Digen Ingti, SGB Rupsing Hans, SGB Hemari Teron, rat asai klembang Mokut Daimary, Tamistan Momin, KSA abarim klembang Sikon Hanse, rat asai klembang Raju Tisso, Kabon beypi, Ganga Boro lapen kaprek kaprek man kedo abangphu atum chetong dun.
Neli jongsi kilik hai lote kapaphihup Dhansiri constituency kapachingthurji aphan un-an klemji. Tovar kavelang adim tovar selamji lapen kijun alang kave arong aphan kijun alang piji anparta ove kimi atum aphan voreng avarsai heihui ta piji pusi non kevangji MAC kilik ahut Dhansiri constituency along songve pen kachedan dunji abangphu Niso Terang chechak.
BJP lapen Congress ratchari asong aphan neli heno pupe, seta kedamtang arni national party pen kachetoi dun atum aphong aphong kilik hai pen EM man dun lo seta kadure mate kapaphihup arat kapachingthurji aphan thangta klemkle det ajoinesi neli kilik kachedan dunji aphan chisik lo puta Niso Terangpi jai.
Lasi kevangji MAC kilik ahut neli hai lote rat apharman un-an klemji lapen kapaphihup arat aphan aprang keponji aphanta klemji puta songve pen kilik kachedan dunji abangphi Niso Terangpi jai.
Mai along kachetong dun kaprek kaprek abangphu-phi atum pen songve pen kilik kachedan dunji aphan kachisik Niso Terangpi along kacherap cheto dunji aphan chechak lapen Dhansiri arat do-anta kacherap dunpetji aphan choningri.
Lason alangli tum pen kejai ke, Karbi Anglong angkang constituency 26 angbong pen Dhansiri constituency hen lo kapaphinai. Lasi kapaphinai constituency aphan aprang keponji aphansi songve pen Niso Terangpi aphan parjap lo. Alangli amethang aning kehang lapen amethang ale aphanle kilik kachedan dun kali bonta Dhansiri arat kachoningri anparta kapaphihup arat apharmansi alangli kilik kachedan dunji aphan chisik lo. Lasi kado kave ta cherap dun lonang puta alohi atum pen jai.
Mai along songve pen kilik kachedan dunji abangphi Niso Terangpi aphan Dhansiri Constituency angkang kedo kaprek kaprek arong lapen kaprek akhei atum pen ningkarong ningkangsam chepaklangsi archo rinti lo.

Leave a Reply

Your email address will not be published. Required fields are marked *

Archives