ADVERTISEMENT

This area is available for advertisement. Please contact for details.

Arnivang
Get Adobe Flash player

HSDC-Congress, BJP lapen AGP atum Aru 17 arnisi ticket pangdak rintipo

UntitledDiphu, Aru 15: Non kevangji Vosik 12 arni Karbi Anglong Autonomous Council kilik padopo pu Assam State Election Commission pen pangdak det aphi Karbi Anglong arlo kedo ratchari asong atum hangjo-hanghai asonsi dolo.
HSDC-Congress atum chelangpetsi kilik kachedan dunji aphan chekroi lo, seta non athe kacholik nangji apor ahut Constituency kachethak along kachetonte kedokok ajoine MAC kilik ahut kachekak dakjisi angring dokok lo. National lapen regional ratchari asong angbong MAC kilik anghoi kachethak alam kapachetonji aphansi nonputa chingvai bom lang. Lasi klardak alam Aru 17 arni ansi klangpo pusi birta long.
Lason ahut isi angkrak pen birta kelongthu atengke pini Aru 16 arni HSDC atum KAAC kaparlo Constituency 26 apharman ticket lapen constituency kachethak amen kapangdak angring do.
Non amat Central, State lapen Council anta kacheraibom BJP atum pini Aru 16 arni angbong ticket komat aphan piji lapen koloso a constituency along kipiji alam paklang detji angring do, seta aron ateng pen ke non kevangji Aru 17 arnisi pangdakji pusi birta long.
KAAC kaparlo constituency 26 along pen bang 200 sose atum BJP ratchari a ticket hang dun. BJP asongja angbong komat abangsi ticket kelongjima pusi BJP arat lapen BJP asongja atum ning thethe bibi asonsi dolo.
Pini penap angbong ticket kapatiniji angring kedo kok ajoine ongdung BJP ratchari asong pen ticket kehang atum Guwahati si tongdam prong asonsi thek long. BJP atum ST kalidet atum aphan ticket kipiji pu alamta keklang ajoine rat lapen rong arlo keklem BJP asongja atum angbong kamatha kisung asonta do puta birta long dun.
La-an chot kali ajahak BJP a ticket kelong dunde atum songve pen kilik kachedan dunji aphan kachisik bom atumta do puta birta long dun.
Karbi Anglong Autonomous Council kilik along non aphong ke Asom Gana Parisad (AGP) atumta ingtangkring pen kachedan dunji aphansi kado kave chisik chedang lo. Laso ateng penap angbong ticket kehang atum amen AGP tiripi atum arideng palepo, laso ateng ingthi ingchapsi kevangji Aru 17 arnisi aron ateng ticket pangdak po puta birta long dun.
Akimi ladak amahang kethek asong People’s Party atum constituency trok apharman pini PP ameiphu Rajen Timung pen kilik kachedan dunji abangphu amen lapen constituency amen pangdak lo. Kedolang Constituency apharman penap kalite penapdik Aru 17 arnisi pangdakji puta birta rip dun long.
Council kilik aphan ratchari atum kehangjo apor atumi pen ke Trinamol Congress atumta rat athengno cheklang dak pen kilik kapachethang pangcheng lo.
Lasi non kevangji KAAC kilik apharman ongdung ratchari atum kilik kachedan dunji abangphu amen lapen constituency pangdak rintipo, lasi rat lapen rong kedo kachonghon ding asongja atum aning thethe bibi alam ke klardak longpo.

Leave a Reply

Your email address will not be published. Required fields are marked *

Archives