ADVERTISEMENT

This area is available for advertisement. Please contact for details.

Arnivang
Get Adobe Flash player

College admission aphrang kethek atum pen bidi-sore enponsi keme

Karbi atum bida kethekji aphan kehung penang an theklonglo. Karbi a-osomar atum school, college kidun aphai nangbat-o lo. La anchot kali angtan anongkachethang arongsopi a school, college pen University along kacharli dun Karbi a-osomar atum aphai nangbat bom lo. Lake ilitum akhei aphan isi keme pik angthek lo. Lason kabor-i pon kedo ajoksi Karbi atum angbong chokamar anghoi kangtui kacholong du atumta nang do bom lo. Bonta Karbi atum api-apo atum kilu-kelom ajok penang api-apo atumke asomar atum aphan methang choche-sele suri, lak atangka pedam seta asomar atum amovang pipedet atum ta do-o. Ahok alam kachini nangji alam ke lahe lo. Osomar aphan lo-bida kapathekji aphan tangka ke akenangsot tema seta tangka do-o lo pule kethek vekji puta lakidet. Kaselet le, ningkiding lapen kahengno abit (Bad influence) pen kachepahelo thek helo akenangsot nei. Lason angthek ilitum angbongta theklong olo. Api-apo atum tangka minta nangne lapen ador keso a school si kachirli dunlonglo puseta akijutke nohok kahelota le dun thekthe. Lapu mate api-apo atum arni bainong chongdatchot asomar atumke amethang kachipiduk, ningkiding lapen kahengno abit pen kachepahelo thek ajok pejo-pejo pen athak arlukrak puta do-o. Lasi lo-bida kethekji aphan penang an ason kachini pon nangji akenangsot do. Asomar-mar atum aphan kapathek kangtung pu amat longri angtan arongsopi heihui along asuri, lak pedampo school, college kachibidun atum dopik. A school, college amen jumesen, prekjek lote asomar atum aphan kachibi dun a suri, lakh atangka pedam veret. Non ke jongjung (private) a school, college heihui si rongsopi pen rongsoso along anta kimu kevang asonsi lokchaplo. Ongdung a private school, college ke kenangsot mate kedovek nangji avarsai heihui ave. Pulonang, kethekser mate seke kelongtang athanbang (Qualified/trained teachers), Science Laboratory, osomar atum kijui-kapathu aklam pen ason heihui pen kaprek-kaprek asomar atum kenangsot kacharli nangji avarsai ave. Bonta lahai avarsai pithekthe ta tangka ke-en (fees) abangke pe-ong dung titi. Puthot bainong kipi kapakom ajok lahai a school, college along kethekser athanbang ta avedet. Lasi Board/University asatlang along lahai a school kacharli a-osomar atum angthek chepeme dun un vangve det. Private a school, college anke hengno meme pule dak kipu dam kali. India adet ongdung school lapen college heihui ke private pen kachari atum si ke-ong. Jatsimetke, Christian Missionery  lapen Company kethe atum kelang pon a school pen college atum helo keme ke-ong. Lasi ilitum asomar atum aphan angtan a school pen college alongsi amen kethap dunji aphan matha pulote kolo pen kodak arongsopi alongsi sorkar lapen private a school pen college heihui keme lahai chini paphrang si keme. Non matric lapen Higher Secondary asatlang angthek keklangji der-o-e lo. Kethek kangtung a-osomar atum non pen anongkachethang a college along kidun longji aphan api-apo atum pen chingki-chingvai bomlo. Ilitum alongri arlo kacharli nangji ason an kedopet a college kaduredet ajok angtansi college dun nangkokpo. Lasi kethekser atum lapen aphrang pen keklem-kachini tang atum along bidi-sore endam nangji. Non akaike jat asonta joike pen kelong ave. Hajat asonta chepate dun nangji lapen undun nangji. Kachepate along undunde pulote aphi sangkok, totham po. Karbi a-osomar atum kachepate anathu paphi dun pik lang. Lake kethek anat kangtangte apotlo. Lasi aphrang karluji aphan  kabor-i aningkehang atum matric pen HSSLC asatlang angthek longdet pen college akeme kidun longji aphan bor-i nangpo. College/University alongta angthek keme vansi detpi alongta chokamar anghoi kangtui aphan chepate dunsi khei aphan anongnam vanpi nangpo.

Leave a Reply

Your email address will not be published. Required fields are marked *

Archives