ADVERTISEMENT

This area is available for advertisement. Please contact for details.

Arnivang
Get Adobe Flash player

IRCSKAB ta ‘World Red Cross Day’ alon pen katalon dun

UntitledDiphu, Aru 8: Somindar along ‘World Red Cross Society’ mahang kethek arni katalon dun along pacheton dunsi pini Indian Red Cross Society Karbi Anglong Branch (IRCSKAB) atum penta methang asaihem along alir-alon pen katalon dun.
Jaimek ateng pen adap porphai 11 apor malom ADC Naba Kumar Deka Baruah arideng pen song alama ingthur lo. Laso aphi working president KAAC EM Surjyo Rongphar Henry Dunant aphan chikimo amelur kai jalin. Laso aphi mai ingni.
SDO N.K Deka Baruah kachepahemphu amai along mai kepha alamthe IRCSKAB sankur chunbang Borsing Phangcho jai. Bangso amai along IRCSKAB working president KAAC EM Surjyo Rongphar, dun meiphu Sitaram Dorjee, rong asar Janasing Bey atum pen chenglok penang an song klembangphu-bangphi atum chetong dun.
Mai along ‘World Red Cross Day’ arni kopi apotsi detpi adang along ta katalon dun nangkok ma lapen Red Cross atum kopipisi keklem ma pu aphuthak klardak pen IRCSKAB working president KAAC EM Surjyo Rongphar jai. Anparta, Red Cross klembang atum ke achiklo abainong pule kedo kali. Methang jongjung atangka cherung-cherek pensi kisung kepho arat atum aphan kerap kipi dun dun. Kerap kipi dun along khei, dhorom lapen song plakple. Pinpurme, lapuson keklem kachepaduk pen detpi adang along Henry Dunant henlo Nobel Peace Prize anong-eh kelong dun cheng abangphu lo puta Rongphar asangho jai.
IRCSKAB asaihem along KAAC CEM Tuliram Ronghang akerap kipi pen conference hall ahem kim rangpo, ring lapen transformer heihui ta kapangniji aphan sai deng tang et puta Rongphar asangho jai.
Kevangji achiklo pen IRCSKAB atum kopi-pi asaisi kedengji ma lapen kopisi keklem nangji heihui aphuthak ta bidi-sore chipi. Athe non barla apor nanglebom, sonsi temon kethe, lang kethe pen chenglok ason-ason akeso pen kisung kepho arat atum aphan koson pensi kapajokji ma mate keklem nangji aphuthak klardak pen SDO N.K Deka Baruah mai kachepahemphu alamthe pen jai.
Anparta, bangso amai along IRCSKAB klembang akimi arpu kethap along Health chunbang Sitaram Dorjee, Disaster chunbang Mensing Rongphang, junior red cross chunbang Thengklong Rongpi, Ajoy Teron, working president Surjyo Rongphar, planning cell chunbang Bapuram Timung, Gautom Ronghang lapen Sopen Terang atum pen chenglok kaprek-kaprek klembang atum aphan SDO N.K Deka Baruah arideng pen seme padeng.

Leave a Reply

Your email address will not be published. Required fields are marked *

Archives