ADVERTISEMENT

This area is available for advertisement. Please contact for details.

Arnivang
Get Adobe Flash player

Nangtum akehang ahokpet pen aron dovek lo: L.S Changsan

State government pharman bangphi-phu Diphu nang kahumri

UntitledDiphu, Aru 5: Assam Political Department & home a state principal secretary L.S Changsan, Additional Director General of Police Pallav Bhattacharjee, Deputy Inspector General of Police B.P. Rabha atum Assam government apharman pini Karbi Anglong nanghumri. 
Laso ahut Karbi Anglong Deputy Commissioner, Karbi Anglong lapen West Karbi Anglong a SP banghini anparta kaprek kaprek saiphu kethe atumta mai along chetong dun.
Assam government apharman Karbi Anglong nang kahumri adilung atum Karbi Anglong arlo kedo isi song kachingrum Hills Tribal Leaque (HTL) atum pen chingvai paprangsi bidisore chepachoi lo. Diphu an kevang alamthe kejai ahut Home and Political a principal L.S. Changsan ahin pen non malom kachethang plup kachesong alam pinpur. Kachesong akrong abangle alam do seta KAAC aphan electoral roll akimi nang ji pu kehang ke aron damjir, lasi song 25 atum pen kachingki akenangsot pusi HTL alamthe kachepaklang dun.
Alanglitum pen ke monsam lapen law and order’ kapathir along ke nanglitum kadokave ta cherap-chetodun nangji puta government pharman bangphu atum ningje.
HTL atum pen chingki chingvai det aphi arni tili apor non malom Karbi Anglong an chot kali Assam adang kapakruhak hamphang asong 26 atum penta Assam government pharman banghu-phi atum chingki.
Kachingki ahut SSIC chief adiviser  J.I. Kathar (IAS retd.) ahin pen Hamphang asong 26 atum ekamang alam heihui lapen kopi apotsi lapu-an angdeng kachesong nangkok ma alam mai along jai. Laso ahut alangli kejai ke, 1950 aningkan kaselam aron kechokche det ajoine non apor ladak kedo vek inglong aso mate Karbi atumsi kejumnai akhei man rong lo. 1951 aningkan census ateng Karbi atum phant 88 do seta kedamtang 2011 aning armu kalakha atengke Karbi atum phant 44 atum ansi dochot lo.
Traditional Village Council alar general village Council si Karbi Anglong arlo kapalutji aphan klem lo. Seta Sixth schedule alongri arlo kosonsi general village council kapado-unpo, athe general village council along ke kado kave atumta vote jok long lapen aning kehang aling village council cheselam un pu heihui alamta SSIC Chief Adviser J.I. Kathar jai dun.
Angtan amonit atum DC asaihem alongle, SP alongle lapen kaprek kaprek asaikam alongle patta kacheselam pen longle kacherai et aphuthak ta alangli mai along jai. Lason thak thak Kheroni, Rongkut, Lorinthepi lapen kaprek kaprek adim along Bongosena atum longle kacherai alam heihui ta mai along jai. Lata 1959 aningkan Land Act kaselam kachokche apotsi lapuson plang lo. Sixth schedule alongri along inglong aso kalidet akhei mate aronre vote kejok ajakong kelong akhei atum chokomar anghoi kelong ke-ongmunak alam heihui ta alangli mai along pinpur.
Lason ahut alangli kejongthu ke, 1938 aphi ningkan 12 mate 1950 aprang kevang atum anke inglong aso kali det seta dolonglo seta laso aphi kevang atum anke aronre voter lo puta alangli lamthe kejai ahut pinpur.
Mai along RNSU ameiphu Phenpiga Rengma kejai dun ke, netum akemang pachun nangji athe lake netum kelong aron do, lahai alam kachingvaiji aphan CM pen nang pachingki long nangji lapen KAAC atum tongsekot amai ingnisi hamphang asong atum kehang alam aphuthak kapachunji aphan chingvai nangji pu kehang alamthe jai dun. Lason thakthak mai hamphang asong pen kaprek kaprek bangphu atum methang methang aning kehang alam chepaklang.
Hamphang asong atum alamthe arju det aphi Political Department & home a state principal secretary L.S Changsan lamvoi kipi ahut kejai ke, Assam chief minister Sarbananda Sonowal kapinkhat atengsi non malom kahurisai alamthe kachiniji aphan Diphu nangpale lo.
Nangli akehang ke ahokpet lo, laso aron constitution along dovek lapen larle tik ke dobom po. Lasi nanglitum Democratic lapen monsam pen chesong bom noi, seta nangli tum kachesong ahut akaprek atum aphan aning kapasodung asai anparta law & order aron arkan ke det nangji puta jai.
Nanglitum kehang alam neli kethekser atum pen chingvai damde aprang ke, kali kalang alam seta neli nangpu tekang thekthe. Lasi nanglitum akehang alam kethekser atum pen chingvai dam po lapen CM Sonowal along an seta nangpale pidampo anparta kapachunji aphan chingki chingvai po puta L.S Changsan jai.
Kilik kapadoji aphan ke ningve isi angbong le chingsoi soi alam kali, lasi State election commissioner atum pen kado kave atemon lang pensi election aphuthak pangdak po. Hamphang asong atum penta kilik aphan deng lo, athe non kedo bom KAAC government ke kedamtang Arkoi achiklo penta kapangdang a government si dobom chotlo. Lasi kapangdang apor kejutje aprang kilik kadoji lapen democratic aron ateng kilik kachedanji ahut monsam atemon kapajapji aphan hamphang asong atum aphan choningri.

Leave a Reply

Your email address will not be published. Required fields are marked *

Archives