ADVERTISEMENT

This area is available for advertisement. Please contact for details.

Arnivang
Get Adobe Flash player

Kelet ta chehum det dat meset!

Kangnep Teron, Diphu:
Karbi a sarlamthe kipu –“apo keteng, aso kangjong” pu helo. Aphi-aphu ,apo akai ahut kamatha kechokche ajok aphi asomar-asumar atum kisung-katora kepho nang aphansi bangso alam kipudam. Bangso alam pini arni Karbi atum aphanta iro kloklo. Ningkan  engkoi thomkep aphrang pen pini arni  anta Karbi  alongri arlo soluk –sodak atemon nang dobom . Bangso  atemon keham pame angthek ave. Malomso ham po puthot thurthu phlut titi .Ahut pen ahut bangso atemon pu-an kejap ahir  ketan titi, reng ahu keso, kithi kejang, khi dat kanahok non chikimo dam lote e-ok chunghur titi . Non lason soluk-sodak atemon nangkejapje ningkan pho anbak adak dolo. Bonta sining kangreng arki nang kedobom lapen inghun ki-ik athan kachingrum  bom ateng pulote komentu ne ahut bangso soluk-sodak atemon nangkejap ahir engtangrak tahai. Ilitum langdam lonang, Karbi akhei ajalin atum kamatha kahelole ajok  Karbi akhei aphan pherememe atovar anat kepon aputhak ningkangsamse angthek kachepaklang ningkan phokep aphrang penlo. Kechengke Hills State kehang, English medium kehang, Roman Script kehang atemon nangjaplo. Bangso atemon la-an ke  kithi-kejang, vi-phik bu nangne pin pensi hamdet asonlo. Bangso aphi ke Autonomous State kehang  atemon nangjaplo.
Bangso atemon ko-an ahir asang kedo ma ilitum methang chichini replo.Bangso aphi temon KNV,UPDS, KLNLF atemon parting apai vang lelo. Iahin japphun ihin jap phun amat  rat atum kedo-kethak anta ok chekom rom anpin puta Karbi  Anglong arat pholo. Puthot, Dimasa pen Kuki athama nang do lelo. Bangso ahut ko-an rat atum kisung kiduk kipho chethan jokphlot lo. 2013 aningkan JACAS atemon men men nangjap phunphun aphike non pu anta la-an ahirkangtangsak atemon phentong nangkejap pu avelang. Bonta non penang an achiklo aphrang pen Karbi Anglong arlo nangkeplang akam angthek pen langdam lote temon phentong vangji dokdok aphrang sining kangder, enghun ki-ik athan kachingrum ason mandet tahai. Tomonpi hamdetle menmen ingsamri asonsi( a lull before the storm) non ilitum alongri alongta cheplanglo. Bonta bangso atomon puthot thur thuthelo pu puthip  un-e . Non malom sining kangder, inghun ki-ik kachimalangpong bom ateng pulote puthot temon phentong kithur thuji der o-elo tahai.
Karbi alongri kopi kedosi son soluk-sodak atemon nangkithur verma pu  cheroktok arat atum katarlip nangji  kenangsot lo.Tarlip pemesi, kichokche mate akeso api kebon adim pangtheksi adovaita ri nangkokpo. Phurkimo alam chini damdete khei aphan mesen atovar keja ponji thekthe. Athema aphrang phrang akechokche chichini tangsi kevangji arni aphan chepakeng ponthekji .Karbi akhei aratchari aphurkimo (Karbi Poilitical history) langdam lote ilitum lahai alam theklongpo. Majok aphanta kelangrop, kelang ai avepin pen phurkimo along kosonsi ketheklong pen kepho ilitum paklang nangpo .Athema phurkimo ke kachobai  ahaki chodunde. Aphrang phrang Karbi  ajalin atum ratchari amo kechokche akam keklemdet (political faux pass) ajoksi pini arni Karbi atum methang alongri arlo along amat ok-chikomrom(insecure) keman nang lo pusi ilitum angbong kethekser atum chot kali bonta angtang aso kethek kere atum Karbi Anglong aputhak katarlip atumta nengje hurlo. Iasi kichokche kithenei ke aphrang ajalin atum kachenam lone kalite kethekthe lone bonta Sixth Scheduled akarjong aphan pathilot(murdered the spirit of Sixth Scheduled)lo. Sixth Scheduled  aron ateng pen Council kilik along khei barim atum aphan vote kejok ajakong (voting rights) kipidet lapen salajong longle-phelang kelang-kachari aron (land policy) kache selam le detra Assam alongri alongri aron kedengdun (adoption of Assam land policy) helo kichokche kithenei. Ilitum ajalin atum lahai akechokche asai keklem ajok pini arni Karbi akhei aphan thepai amang alongsi kaparjap mandetlo. Bangso akechokche ajok ratchari ajakongta, longle-phelang anta  bang akhei atum arideng hodai lap ason mandetlo. Akaprek alongri -Khasi Hills,Jaintia Hills Council kilik along khei barim kalidet atum vote jok dun longle .Lahai alongri along longle-phelang kelang-kachari ajakong longri arecho somar, habe, pinpo , rong asar (traditional chief)atum aphansi ajakong pilo. Lahai aron kedokok ajok lahai alongri along khei barim atum Ilitum Karbi atum ason angtan aso nangdongthiplo pu kaphere dam adim ave detlo. Sixth Scheduled pu mesen lahai aron anta kacheselam thektheke ilitum ajalin atum aphan chokche pudamdete kipu ji alam akaprek avedetlo. Ilitum ajalin atum kaprek kaprek ason kichokche asai keklem do-olang. Iasi kethe dungke School along osomar aphan kethan alam (medium) Assamese alam kedeng pon helo lapen Karbi alam ketok aphan amek (Script) kapithir thekthe helo. Methang angbong English medium pen Assamese medium alam pen kachihili ansi aningkan ningkan pedamtaplo. Pini angthek pilo kitheklong? Non anta Karbi alam pen School along kacharli avarsai pithekthelang lapen ongdung KAAC kelang pon a School ke Assamese si ke-ong lang. Ladakta jalin atum kechokche pen aning kelangno alamlo. Karbi api apo atum asomarmar atum aphan English Medium a school si ketoi ning kehang saide. Bonta avarsai kave ajoksi Assamese a school kachitoi dunchot. Bonta jalin rat atum English a school kehang along  khamkhe dun thurong . Pu mate amethang asomar atum aphanke ador keso Private English Medium a school si toi dun thei. Jalin atum asomar  Karbi Anglong keseng arni pen non an Assamese a school kachetoi dun abang doma ?Aning mesen pute sorkar pen English Medium a School bipi nangji apotlo athema alangtum jongjung a tangka le kidamji kali. Jalin kichokche ajok kiduk, sai chongdat chot atumta private English Meduim a school along asomar atum aphan kachetoi dun thurpak non ilitum theklonglo. Karbi arat kar-I nei ahemprek kehang alongta ilitum ajalin atum kacherap dunji kali kakhamkhe dun lok angtheksi klanglo, Ahut pen ahut kachekroi angthek chepaklang dun seta vote kelongji aphanchot kali asonte pini arni ilitum lason chiplangpledet po. Lahai kado kave angthekke phurkimosi kachibei un-epin ahaki nangcho dunlo .Majok amonit mate ajalin aphan langrop-lang-ai (without biased) ave pin pensi pudam nangkok po 1950  Karbi alongri keseng pen pini arni Karbi ajalin atum ason ason ratchari amo kichokche akam kiklem do-o apotsi pini arni ilitum la-an kisung pho nanglo. Pharo pharo arisomar atum akan avepin rongsopi atovarpi along pirthe monit langdun phrong kachesong armu chejeng asai kedengke  bidi kijut apotlo. Lake bang akhei atum ason pran kachirmut abomb (suicide bomber) pu klem ponpe pu anatlo.Netum asong asongja aphansi nang sorsa pi viret pu matha nangne ningkan throkep sose KAAC kachari long ajalin atum an aphan an aphan  pu rap petlo.

Leave a Reply

Your email address will not be published. Required fields are marked *

Archives