ADVERTISEMENT

This area is available for advertisement. Please contact for details.

Arnivang
Get Adobe Flash player

Kachechak ateng BJP atum Article 244(A) pachun nangji kalite kachobai chot pusi pachethangpo: JACAS

UntitledDiphu, Jangmi 29: 2008 aningkan Halflong along rat amaipi kangni ahut halaso ahut BJP ameiphu kikhi abangphu Rajnath Singh kaningje lapen 2009 aningkan BJP abarim asongja L.K Advani Kheroni along kaningje tekang atengsi BJP atum nonputa dothipsi state so lapen Article 244(A) ta kilik hai lote pachun po pu Rajnath Singh kaningje ateng BJP sankur chunbang Tapir Gao BJP KADC ameiphu aphan 2013 aningkan tokjir aloh pen birta nangpale.
Laso aphi 2014 aningkan Karbi Anglong, Dokmoka along kilik kapachethang amai kaningni ahut BJP ameiphu Rajnath Singh kaningje tekang thu ke, BJP jongsi centre along kachari ajakong kelong lote Article 244(A) kapachunji aphan ardi pipo pusi chechak tekang.
Laso ateng BJP Karbi Anglong district atum pen chingki-chethansi JACAS atum kedamtang parliamentary kilik ahut chepaklang dak pen cherap dun lo. Laso ajoine Congress atum kithirthip adim BJP aphan adunthu angdeng anke padun unlo. Laso aphita chingki-chethan thusi kedamtang 2016 aningkan Assembly kilik ahutta JACAS atum BJP aphan cherap dunsi inghoi pli angbong pen inghoi kethom pahai lo.
Kedamtang 2014 aningkan pen centre along BJP atumsi government chari lo. Laso aphi Assam along ta kedamtang aningkan Aru chiklo pen ke BJP atumsi government chari lo. Kedamtang Jangmi 9, 2015 arni kachingki pangcheng thudet netum ningkan hini anbak inghong lo lapen langdun lo. Seta ajir dingklui rat akar-i autonomous state aphuthak thangnat ta sai kedeng thekdun longle.
BJP-Karbi Anglong District Committee atum kilik ahut kachechak alam lapen autonomous state alam ke tengne det asonsi man.
Kilik ahut kachechak ateng, Karbi Anglong pen Dima Hasao along kedo Bodo atum aphan ST(H) pi-un, Bangladeshi Hindu atum aphan Citizenship pi-un lapen Assam along kedo khei trok atum aphan ST parlosi kilik ahut kachechak ateng pachun lo. Seta kilik ahut kachechak constitution along kedo kok Article 244(A) kapachunji aphan thang ta klemkle. Lasi paderde pin pen dilung kethom kachingki pangcheng thusi autonomous state alam pachun nang po pusi pini pherangke amai along JACAS ameiphu Khorsing Teron jai.
Journalist Association of Assam ameiphu Dhirendra Nath Chakraborty lapen Jyestha Nagarik Sanmilan asongja atum kapinkhat ateng ke, Barak Valley along kdo kethom a district, Lower Assam along kedo hini a district, BTC kaparlo pli a district lapen hini inglong a district Karbi Anglong pen Dima Hasao atum aphan Assam along new state selam nang po. Lapuson kamatha nangkok atheke, akenangsot lapen Assam state atum apreng asonsi district 11 ke dokok lo. Puthot alangli kaningje thuke, Karbi Anglong pen Dima Hasao along kedo phant 95 ove kimi atum Assam lapen Assamese aphan aning dokde tang lo. Laso ajoine Assamese aphan kelangselet atum pusi amen dokok lo.
Non hetjong state education minister Hemanta Biswa Sharma kapangdak, Assamese alam Assam arlo school tin along envek nang po pu alam nong kevangji Paipai achiklo Assembly kachingvai along ponpo pu kamatha ke, state government atum pen Assam akimi state alam kamatha pensi kaningje lo pusi Khorsing Teron pherangke amai along jai.
Kedamtang 1960 aningkan state language policy ajoinesi Assam kachethak lo. Non apor Assam kethak lapen Assam State Re-organisation thu nangkok ke, state along kivir bom inglong aso atum methang ajakong, jutang heihui kacheraikom thekji aphan puta pherangke amai along JACAS chairman Khorsing Teron pangdak.
Diphu Press Club along pherangke amai kangni ahut, Stalyn Ingti, Samsing Hanse, Nathan Ronghang lapen kaprek-kaprek JACAS klembangphu atum chetong dun.

Leave a Reply

Your email address will not be published. Required fields are marked *

April 2017
M T W T F S S
« Mar   May »
 12
3456789
10111213141516
17181920212223
24252627282930
Archives