ADVERTISEMENT

This area is available for advertisement. Please contact for details.

Arnivang
Get Adobe Flash player

Rongapahar Range angkang hect. 700 angdang thengpi aklim ke-eh

Untitled Diphu, Arkoi 22: Forest West Division kaparlo Rongapahar Range pen Sika lakh 49 atangka padamsi hectre 700 adang along athengpi aklim ke-eh.
Government kapathik aron ateng Joint Forest Management Committte (JFMC) sengsi thengpi aklim ke-eh asai JFMC atum pensi patirpi lo. Elong vet adim lapu-an adang kethe alongle kave det ajok troksi JFMC sengsi long troksi adim along thengpi aklim eh lo. Rongapahar JFMC patirpisi Rongapahar along amat hectre isi Untitled alongle adang along kado kave rong 2,500 athengpi aklim eh lo. Kharmai Disa JFMC atum patirpisi Kharmai Disa along, Jalad Hasan JFMC patirpisi Jalad Hasan along, Nogaon Basti JFMC atum pen Tamul Bari along, Langkhailu JFMC atum pen Langkhailu along, Disagisim JFMC atum pen Sibnagar along lapen Dikoi ahavar along kedo Tamul bari-2 atum pen Tamul bari-2 along amat thengpi aklim eh lo.
Kado kave long troksi thaksi hectre 700 adang along a hectre tin along rong 2500 athengpi aklim eh lo pusi Rongapahar Range a Ranger than.
Hectre isi along ke-ehji aphan thengpi amu kalite aklim kenamji aphan Sika 840 atangka government pen kejong do. Thengpi amu/aklim eh-e aprang sai keklemji aphan ta hectre isi apharman Sika 4620 an government pen kehot do. La-an chot kali, laso along Sika 154 anam pen bang 30 atum aphan sai paklem nangji puta government atum pen kehot do puta ranger pachini.
Thengpi aklim eh det kalanaji aphan hectre isi apharman Sika 1540 government atum pen hot. Laso asai along bang kep atum Sika 154 anam pen sai paklem nangji puta government pen hot.
Asai lapen atangka kachingbarbe det ajok nonputa thengpi aklim kenam atangka lakh isi sose preng dolang puta ranger ningri. Hectre 700 adang along jasemetpet meh kachethor aphan ke-en meme athengpi aklimsi jasemetpet Forest asaikam atum pen eh lo. Lahai athengpi jongsi theding long pame pulote havar kedo arat atum theng aphan ke matha nang oh-eh puta ranger pachini.
Theng aphan thengpi aklim ke-eh pen ajok ingnam ta rai po lapen thengpi aklim kerai ajok kaprek-kaprek ingnam along kedotang athengpi-thengprang anparta ingnam api heihui anta jokpo puta forest asaikhi atum ningje.

Leave a Reply

Your email address will not be published. Required fields are marked *

January 2016
M T W T F S S
« Dec   Feb »
 123
45678910
11121314151617
18192021222324
25262728293031
Archives