ADVERTISEMENT

This area is available for advertisement. Please contact for details.

Arnivang
Get Adobe Flash player

Arkoi 25 arni TET thanbang atum kachesong asai dengji

Parakhowa, Arkoi 22:  TET athanbang atum kangchir kelang-ik along Assam government kelang kapangkre aphuthak kaprek-kaprek kachesong akengkam dengbom lo. Kedamtang Assam minister barim Dr. Himanta Biswa Sarma education arpu kedeng bom apor ahut Assam arlo loh kacharli ahin kapachingthurji aphan chokamar kelong dunde ariso-ejang anparta kithurmi osomar atum aphan kemesen kacharli avarsai kipi thekji aphan
pura TET asatlang patoksi thanbangphu/phi anghoi pek lo. Bonta halahai thanbangphu/phi atum amethang kelong nangji ajakong heihui longle det lo. Laso aphuthak TET thanbang atum isi pen isi kachesong akengkam dengbom lo. All Assam TET Teachers Association (AATTA) tiri amei atum kapangdak ateng pen Arkoi 21 arni pen kechengsi kachesong akengkam dengthu lo. Laso kachesong along Karbi Anglong aro atum ta chedon dunsi Arkoi 21 arni district arlo TET thanbang atum an aki-ik a apeh chepabonsi kachesong lapen pini 22 arni abang ke school ahem loh thandam vangve. Laso ajok lakh-lakh kacharli osomar atum loh kacharli ahin tikuk dun lo. Halapu chief minister Tarun Gogoi kachari Congress a sorkar along kaprek-kaprek asaikam chingthur pik lo pu mai-thai along kachepindak bom apor ahut Gogoi ministry along kedo education minister Sarat Borkotoki education asaikam along buruksai asonsi nangman det lo. Laso ajok kacharli osomar atum akangting atovar anatthusi dam bom lo. Detpi arlo inut kemesen abangphu/phi kachepamanji aphan aho-or kipidun thangbangphu/phi atum aphansi sorkar atum ardi kipipe det ke ningduk meme.
TET thangbangphu/phi atum aphan education minister Sarat Borkotoki batai-batai kachongthui, apor ateng pen bainong kipipe, kedamtang Matijong achiklo pen bainong kipipe aphuthak lapen Jakhong achiklo pen kelong nangji DA atangka, 2012-13 aningkan along kangvai kethek-kere TET asatlang along ki-un dun thanbangphu/phi atum aphan kithirthip anghoi kepek, ROP ateng pen kehot achiklo bainong long nangji, achiklo jonvang niphai pho arni aprang bainong pi nangji, arong kachevoijui ahem asor atum aphan tangka Sika lakh pho kerap pi nangji pu heihui pachinisi Arkoi 21 arni pen kachesong akengkam deng lo lapen non kevangji Arkoi 25 arni pen puthot chesong thuji pusi Karbi Anglong TET Teachers Association a meiphu Upakanta Teron pen chunbang Jitu Kalita atum pangdaksi halabangso kachesong arni district arlo kedo-an TET thanbangphu/phi atum aphanta kacheto dun petji aphan alanglitum choningri.

Leave a Reply

Your email address will not be published. Required fields are marked *

January 2016
M T W T F S S
« Dec   Feb »
 123
45678910
11121314151617
18192021222324
25262728293031
Archives