ADVERTISEMENT

This area is available for advertisement. Please contact for details.

Arnivang
Get Adobe Flash player

Arkoi kechengsi arni pen ghonta 24 rihing ame chethor long po: Rockibul Hussain

Guwahati, Matijiong 16: Nangkeleji ningkan kimi Arkoi achiklo kechengsi arni pen Assam ahavar arlo kedo arat atum ghonta 24 rihing ameh chethor long po lapen There achiklo an kachethor anam pabatbe pusi pini Dispur along pherangke amai kepha ahut Asom Power Minister Rockibul Hussain ningje. Ghonta 24 rihing ameh kachethor longji aphan Assam government atum rihing ame kipi electricity company kethom atum pen chingvai lo. Ghongta 24 rihing ameh kipiji aphan company kethom atum tangka Sika 326 crore subsidy hang lo. Laso atengnsi Assam sorkar atum ta laso atangka kipiji aphan cheparai lo lapen non kevangji There achiklo an rihing ameh kachethor anam pabatbe pusi pherangke amai along minister Hussain pangdak.
    Minister Hussain kapangdak thu ke, Rahul Gandhi Barpeta kahumri damji pu asai kapachethang aphijong Himanta Biswa Sarma abang Rahul Gandhi aphan khamkhe dunsi pinrem dun lo. Barpeta Medartari kopi aphansi kedam nang po pu alam arjusi halabangso abangphu kipu dun atengke isi akhei aphan kelangremji aphansi Rahul Gandhi Barpeta kahumri dam pu ningje lo. Non halabangso kaningje abangphu amatsi amethang jung-jung ratchari ale aphan phusar/phisar akai ahut kachinghon asimbom kapavirji aphansi arjap lo. Halabangso abanghu ahut isi Kalgasia isi amai along chetong dunsi gamusa kachingthang lapen phutup chikup dunsi ratchari asai klem lo. Non Rahul Gandhi Medartari along gamusa kachingthang ajoksi halabangso abangphu amek keso dun lo ma pusi pherangke amai along Rokibul Hussain arbok. Rahul Gandhi Medartari kahumri dam ahut alamki aphuthak klardak pen ingsai nangji lapen Assam along BJP atum cheparoka ongchot lo. Lasi 2016 MLA killik ahut Assam along BJP atum kacheparoka aphuthak angthek chethek long po pusi pherangke amai along Rockibul Hussain ther.

Leave a Reply

Your email address will not be published. Required fields are marked *

December 2015
M T W T F S S
« Nov   Jan »
 123456
78910111213
14151617181920
21222324252627
28293031  
Archives