ADVERTISEMENT

This area is available for advertisement. Please contact for details.

Arnivang
Get Adobe Flash player

Son pli kehang kachepaplengji aphan sangti kekhang

Diphu, Matijong 15: Monit kerengji aphan lang kenangsot binong, athe kijun pen chenglok kitun-kedang, chinglu-chingthi anparta arni kedo kedam along ta lang akenangsot do binong. Lang le ave pulote monit kerengji aphan kasiksak thetan khangjang.
Pinpurme, Diphu ahithi angkang kedo arat atum aphong-aphong lang kedorde akisung chetong nang lo. Seta kopi apotsi lapuson akisung kachetong nangkok ma rat atum mathathesi PHE asaikam aphan kechokche akoi pilo. Seta kado kave ta chini nangji Diphu ahithi angkang kedo arat atum apharman Longnit pen Manja Jamuna alangroi pensi Diphu lang van lo.
Non apor lahai alangroi along scientific aron ateng pen sangti kiphurphe lapen ajahak aning kelangno abangphu atum methang ale aphan kachematha chot ajok Volvo, JCB heihui a machine pensi sangti phur lo. Lapuson machine pen sangti kiphur ajok langroi aklong aphan panahok lo. Pinpurme, Karbi Anglong Nihang ahavar kedo Dokmoka, Langhin, Patradisa, Longnit, Manja lapen kaprek-kaprek adim along aronre machine pensi sangti phur lo. Laso ajok lang temon (Ecosystem) aphan thedung kanahok dolo. Lahai kado kave alam rat atum chini pame seta thang ta ningje dundesi lang dun prong pusi hamphang asong Karbi Students Association (KSA), Karbi Farmers Association (KFA) lapen Karbi Anglong Chamber of Commerce (KACC) atum jong.
Lahai asai keklem along ongdung abangphu atum Forest Act karkan, aronre keklem lapen matha pamemesi sangti kiphur asai ingtonte pin klemsi Dimapur pen chenglok angtan a state along ponbom lo. Sangti kepon atum ahokhe a Transit Permit (TP), arni kilit tang a challan heihui pensi arnivang sangti kepon puta song atum jong.
Lapuson asai langno keklem along Nitu Sumi cheparjan Nonda Singh si kapaklem toi puta jong. La-an chot kali alangli saiphu lapen ajahak abeha keklem atum aphan kether-kehap asai ta klem. Lapuson alangli keklem langdun ding un-eh pusi KSA, KFA lapen KACC pachetak.
Lapuson aronre keklem kekhang dunji lapen lang temon kapamesenji aphan pu mathasi hamphang asong atum pen kethedung asai deng nangkok lo. Nonda Singh lapuson keklem chechak un-eh lapen diya chohang vek nangji, sangti kiphur ahut Volvo, JCB heihui a machine en longle, truck along abat thap longle, ahokhe TP, challan pen sangti pon longle, mahal holder atumsi district pen angtan sangti pale long chotji pu heihui aphuthak hamphang KSA, KFA lapen KACC atum kehang paso.
Kehang ateng paplengple tik ke kachesong ingtonte pusi hamphang asong KSA, KFA lapen KACC atum birta pangdak aloh pen birta pachetak.

Leave a Reply

Your email address will not be published. Required fields are marked *

BREAKING NEWS
December 2015
M T W T F S S
« Nov   Jan »
 123456
78910111213
14151617181920
21222324252627
28293031  
Archives