ADVERTISEMENT

This area is available for advertisement. Please contact for details.

Arnivang
Get Adobe Flash player

Dispute Area hoksi kachingthur asai kedengji aphan hin-hin district a DC kacharju seroiji aphan kacherai

Ri-bhoi-Karbi Anglong ahoi aphuthak kachingvai

Untitled Chinthong, Matijong 11: Kedamtang penang arni pen lamki kedo Karbi Anglong pen Ri-bhoi district ahoi aphuthak pini Karbi Anglong Baithalangso PS angkang Ullukunchi police out post arlo Sabuda PWD IB along magisterial level amai ingni.
Mai along Karbi Anglong anatthu pen Hamren Border Magistrate Partha S. Jahari, Baithalangso Police Station CI Mukul Saikia, Donka Revenue Circle a Asstt. Settlement Officer Dilip Teron, Habang Umjakiri Range IC Dhansing Terang, Akhil Kumar Talukdar, Hamren Sericulture a Superintendent Manoj Chakravarti, Sericulture Inspector Jagat Rabha, Ulukunchi PWD Umpanai Roads Division EE J.K Goswami lapen  Ulukunchi PWD Umpanai Roads Division AEE G.A.N Ahmed anparta ARO N. Ronghang. Halapu Ri-bhoi district anatthu pen I. Bairo, Bhoirymbong PWD Roads Division a AEE D. Laloo, Umswai Police Station OC E.D. Hmar, Nongpho EAC Janathan Shylla lapen Mawlasnai Out Post SI S.B Siangshai atum chetongsi ahoi aphuthak chingki-chethan.
Mai along kachingvai ahut Karbi Anglong pen Ri-Bhoi district ahoi ke Dispute Area pusi patini lo. Lasi Karbi Anglong pen le bangso ahavar along kachingthur asai dengji puseta Ri-bhoi district a Deputy Commissioner aphan arju detsi klem nangji. Lason thakthak Ri-bhoi district atum pen kachingthur asai klemji puseta Karbi Anglong a DC aphan arju nangji pusi mai along cherai.
Pinpurme, kedamtang arni Meghalaya government atum pen Karbi Anglong ahoi ahavar kedo Jatalong War Bosti pen Malasnai kacheleng atovar km 1 ½ kaselam. Lason thakthak Meghalaya Sericulture asaikam lapen Block along nang kele kachingthur asai heihui ta Meghalaya government atum lahai ahavar along keron kebak ajok hur chodut lo. La-an chot kali Right Nongtung Area pu amen pen longle nang kacherai lapen kaprek-kaprek kachingthur heihui asai ta Meghalaya government atum pen nang klem lo.
Karbi Anglong district kaparlo Madan Umwang along anta Meghalaya a government atum longle nang kacherai angthek Presbyterian Mission School kangpu along-eh kesom along anta klangdak lo. Athe district Karbi Anglong pu ketok nangji adimsi Nongtung district pusi chetok lo.
Lahai asai Meghalaya government atum pen aphong-aphong longle nang kacheraiji aphan kabor-i ver ajoksi lamki lamphong do lo. Lahai alam kachepangsamji aphan pusi hin-hin ahamphang asong atum angbong ta aphong mai ingni lo seta kangsamse det ajok pini magisterial level amai ingni nangkok lo.

Leave a Reply

Your email address will not be published. Required fields are marked *

December 2015
M T W T F S S
« Nov   Jan »
 123456
78910111213
14151617181920
21222324252627
28293031  
Archives