ADVERTISEMENT

This area is available for advertisement. Please contact for details.

Arnivang
Get Adobe Flash player

KFA amahang kethek arni katalon

Untitled Diphu, Matijong 6: Pini ingdeng pho Karbi Farmers Association amahang kethek Diphu Rangsina Cultural Institute Hall along talon.
Adap apor Karbi Farmers Association ameiphu Samsing Hanse arideng pen song alam pangjarsi ingdeng pho KFA amahang kethek katalon ajaimek ateng sai deng lo. Mahang kethek katalon amai along alohi aman pen JACAS chairman Khorsing Teron, advocate Sarthe Ronghi, Thekar chapbang Longsing Teron, KAIYA ameiphu Stalyn Ingti, KUYA ameiphu Daniel Bey, KARGA dun meiphu Sathe Kramsa lapen Bireswar Hanse atum chetong dun.
Mai along alohi aman pen kachetong dun Sarthe Ronghi lamthe kejai ke, sai katiki atum kachesong pensi pirthe adang ta kachingthur lo. Sai kati atum aphan ke asai hen lo ajutang. Sai katiki atum amethang asai kacheklem ahut ongdung kisung chetong. Laso ajok kedamtang 1997 aningkan pen non lakh 3.50 sai katiki abangphu atum amethang apran charmut lo. Lasi lahai akisung pen kachepajokji lapen amethang apran kacharmut jokplotji aphan kedotang atangka kachepangrum akenangsot binong.
Karbi Anglong alongle ke ser alongle binong athe ajat asai le chotiki seta kememe detji alam ave. Lasi sai katiki pen lok ta chepareng un pusi JACAS chairman Khorsing Teron mai along jai. Non kai kimi ahut an kecho lapen ok kecho chot ke monit akai pleng un-eh, lasi tangka poisa ta nangkok. Tangka poisa kachepalongji aphan kaprek-kaprek tangka kelong asai ta tiki nangji puta JACAS chairman jai.
KARGA dun meiphu Sarthe Kramsa Karbi khei akisung, kachelar lapen kacherok nangji aphuthak jai. Puthot alangli sai katiki, chainong kapangreng lapen rubber katiki pen ale aphuthak ta jai.
KFA atum akemang do-an KAAC aphan chiki lok ke pachun un-eh, lasi akaprek atovar chiri pen angkangtui angdeng anta arlu dun nangji pusi Thekar chapbang Longsing Teron jai. 
Lamthe kejai ahut PM Narendra Modi kedeng a scheme Mudra Bank pu isi a scheme mortgage pipe pen loan kelong lapen Corporate Social Responsibility (CSR) aphuthak jai. Mesen sai keklem angthek chepaklang thek pulote Sishu, Kishor lapen Tarun pen Sika 50,000 pen 10 lak an bank along pen keram kelongji heihui alam ta Teron mai along than pachini. La-an chot kali sai katiki atum aphan government atum pen kaprek-kaprek avarsai kithik lapen kipi bom aphuthak ta mai along Teron jai tekang. Sai chotiki asong atum pensi rong arlo kedo sai katiki atum aphan akimi abidi heihui than pachini pon nang po.
Mai along kachetong dun kaprek-kaprek alohi atum penta KFA aphan kapare alam pen chenglok ongdung ardi kedo klong alamthe heihui jai tekang.

Leave a Reply

Your email address will not be published. Required fields are marked *

December 2015
M T W T F S S
« Nov   Jan »
 123456
78910111213
14151617181920
21222324252627
28293031  
Archives