ADVERTISEMENT

This area is available for advertisement. Please contact for details.

Arnivang
Get Adobe Flash player

Komat asongsi tangka kirung thap ma KACC jongvet nangji: KFA

KFA Demand Charter ateng asonte chingthur oji

Diphu, Matijong 4: Ningkan 30/40 pen kevangbom Deptt. atum pen sai-chotiki arat aphan ason-ason hormu keron lapen Scheme heihui deng bom lo. Hormu lapen chili keron chot ke sai-chitiki arat aphan ingthur pon un-e pu mathasi kedamtang 2010 aningkan Matijong 6 arni Diphu-Amolapatty along Karbi Farmers Association (KFA) asong mahang pathek lo. KFA asong amahang pathek det aphi ‘Charter of Demand’ ta government arideng pale lo.
KFA a Demand Charter aphuthak PMO (Prime minister office) pen kido Ref. No. PMOID.13/3/2014-PMP3/12799 Dated 31-01-2014 lapen KAAC pen Ref. No. KAAC/PS/MEMORUNDUM/2015-16/17/13, Dated 04/11/2015 akido nang pale lo. KFA kemang aphuthak central government lapen KAAC, Diphu pen ardi pi pu asonte Karbi Anglong sai-chotiki arat kathe-ang atovar kengkam chejor longji apot lo pusi KFA sankur chunbang i/c Financial Affairs Longki Tisso pangdak.
KFA akemang kejong son 32 angbong pen rat ale kedo ke Minimum Support Price (MSP), Farmers Pension, Water Conservation, Drip-Sprinkler Irrigation, Crop Insurance, Cold Storage Building, Agriculture Research Institute, Hamren Organic District, 75-95% subsidy for mechanical farmers, Farmers Credit Gurantee lapen Separate Agriculture Planning & Budget heihui Karbi Anglong Autonomous Council along kapadeng ponji aphan ningkan isi along Sika crore 100 lapen Water Conservation, Drip & Sprinkler Irrigation apharman ningkan isi along Sika core 100 panong nangji pusi KFA pen kehang paso lo.
Lahai amo kapachunji apharman KFA klembangphu-bangphi atum angthikjot pen sai keklem kedo kenangsot lapen chotiki rat aparta kethe-kiding atum kacherap-cheto dun kenangsot binong, bonta KFA asong amen en-lok, chonpro-chonjam lapen arong kechelang lapen komatne-komatne aphan kether-kehap pen tangka kirung thap aphan le KFA asong keseng kali.
Karbi Anglong Chamber of Commerce (KACC) pen Karbi Anglong arlo 88 hamphang asong do, lahai kapangdak aphuthak kedo an a hamphang asong aphan kejong ponprui pen anparta komat hamphang asong aronre pen tangka kirung thap ma rat aphan pachini daksi akeme, athe kado-kave hamphang asong do an atum pen town committee lapen KACC angbong kachingvai rapsarsi keme.
Ahok Karbi Anglong arlo hamphang asong do-o lapen hamphang asong atum ason-ason ajaimek kedeng ajok beha klembang (Business Man) lapen government institute along tangka maha kirung do puvoiphit setame Karbi Farmers Association (KFA) pen ke rat aphan pasungkrung anke madu along penta tangka rung longle lapen ningkan isi along betai hini-kethom ansi KFA amen pen tangka rung chot, lata Corporate Social Responsibility (CSR) for source of farmers aron ateng pensi government institute lapen beha klembang atum along pen kerap chohang chot.
Kerap nangkipi dun atum aning rengme-rengno atengsi chodeng bom lo, anparta dorde-phophe anke KFA abangphu (Member) atum angbong kachirung pensi rat lapen hamphang asai klem ibom lo pusi KFA dihin chunbang Longki Tisso birta pangdak aloh pen birta pachetak.

Leave a Reply

Your email address will not be published. Required fields are marked *

BREAKING NEWS
December 2015
M T W T F S S
« Nov   Jan »
 123456
78910111213
14151617181920
21222324252627
28293031  
Archives