ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi akhei chepachor-cheparup lapen kachelir kopuson

Kamsing Ingti,
Rongbithi, Diphu.

Pirthe akhei tin ta kaprek-kaprek akur do. Kaprek akhei pen pangbar lote Karbi akhei keprek thepik chenam. Ilitum chini Karbi akhei angbong kur kangthim kurpi son 5 (pho) an do. INGTI, TERANG, TERON, INGHI lapen TIMUNG henlo. Ingti henlo karbi akur angbong akleng si lo, pu  Karbi kurpho angbong baduta ilitum chini.
    INGTI akurta angbong son 5 (pho) an do. Bangso angbong pen, 1) Ingti hensek, 2) Ingti Kathar, 3) Ingti Taro, 4) Ingleng, 5) Ingti Killing henlo. Ingti akur aphan an ke Lijang mate Li-e puta pu.
    Bey-Kro akur atum angbong ta son 7 (throksi) an do. Bangso angbong pen, 1)Terang Dili, 2) Terang Rongchecho, 3) Bey ke-et, 4) Bey ke-ik, 5) Kro Nihang, 6) Kro Nilip, 7) Terang Ingjai henlo. Bey akur aphan Dingjang mate Ding-`e, Kro akur aphan kronjang mate kro-`e, Terang akur aphan Hanjang puta ir.
    TERON akur 6 (throk) an do. Bangso angbong pen. 1) Teron kongkat, 2) Teron langne, 3) Teron Millik, 4) Teron Dengja, 5) Teron miji lapen 6) Teron Ai henlo. Teron akur aphan an ke Lonjang mate lon-`e pusi kepu dam.
    TIMUNG akur 30 (thomkep) an do. Bangso angbong pen ke, 1)    Timung, 2) Killing, 3) Kleng Rongphar, 4) Chalongsenot, 5) Senar, 6) Pator, 7) Senar Meji, 8) Senar Pator, 9) Senot, 10) Senar Musuki, 11) Tokbi, 12) Timung Rongpi, 13) Tokbi Dera, 14) Toktiki Timung, 15) Killing Tokbi Chinthong, 16) Tokbi Ronghang, 17) Dera, 18) Nokbare, 19) Nongdu, 20) Nonglada, 21) Phangcho, 22) Phangcho langteroi, 23) Phangcho Ingnar, 24) Phangcho vojaru, 25) Musuphi, 26) Rongphar, 27) Rongphar phura, 28) Rongphar Ronghang, 29) Phangco Juiti lapen 30) Tokbi Killing Timung akur atum aphan anke Tungjang pusi pudam lo.
    INGHI akur ta son 30 (Thomkep) ando. Bangso angbong pen, 1) Lekthe, 2) Ke-ap, 3) Renglum, 4) Rengte, 5) Reng-oi, 6) Ronghang, 7) Ronghang hempi, 8) Ronghang lindok, 9) Ronghanghemso, 10) Rongpi, 11) Rongpi Ronghi, 12) Rongpi Rongchehon, 13) Rongpi Ronghang, 14) Rongpi Amri, 15) Rongpi Lindok, 16) Rongpi Pherangke, 17) Kramsa, 18) Bongrung, 19) Tisso, 20) Tisso Rongphu, 21) Tisso Rongchitim, 22) Tisso Rongling, 23) Tisso Adar, 24) Tisso Motto, 25) Hanse, 26) Hanse Durong, 27) Hanse Chinthong, 28) Hanse Nongkirla, 29) Hanse Muji lapen 30) Hanse Rongcheicho henlo. Inghi akur aphan anke Ejang pusi pu lo.
    Karbi akhei angbong  hako pen non anta kertang aron do. Ilitum Karbi akhei ke kaprek akhei atum ason kali aron ateng do. Non ilitum Karbi korte ingjir atum kachehang kacheron kadore thetan mate kachehang anta kachini ne theklong. Kaprek akhei keche, Ahom aso, ason kali-kalang aphanta Ik, Korte, Ni, Lok, Phi, Phu, Punu, Pinu, kachekam aron ave. Ilitum akhei along kertang aron do. Kona-mana akhei atum kur isi angbong che-en chedo aron do. Bonta Karbi akhei Kur isi angbong che-en chedo aron ave. Athema kur isi Ingtipo pen Ingtipi, Terangpo pen Terangpi, Teronpo pen Teronpi, Inghipo pen Inghipi lapen Timungpo pen Timungpi che-en chedo aron ave.
    Jongsi kur isi angbong Ingtipi pen Ingtipo, Beypi pen Beypo, Terangpi pen Terangpo, Inghipi pen Inghipo, Timungpi pen Timungpo angbong kelet kephet pen chepachor cheparup mate che-en chedo dokok pulote kur isi angbong ke “Kur Senem” pulo.
    Pei akorte asopi asopo atum pen akur le kaprek jam pusitame jongsi chepachor cheparup mate che-en chedo dokok pulote “Lai Senem” pulo. Lapuson saidu saikha asopi sopo atum ke Karbi along chepachor cheparup ke kertang aron lo.
    Karbi akur do anta methang methang anihu dorep. Methang methang anihu asopi si karbi aron ateng pen chepachor nangji aron do. Methang akur angbong pen angtan aphan panihu thu rong pulote nihu charkan mate “Jong Senem” pulo.  
    Pirthe aot-e, kacheplang monit tame marat mareng tame kacheplang do kok titi. Jongsi monit aot-e marat mareng tame cheplang det pulote mate Polingjen (pinso) hijan lapen pilingjen (Arloso) hijan che-en chedo pulote “senem” api alo.
    Karbi akhei along jongsi puson kurjon angbong kelet dokok pulote kaheno nai lo. Lapen Bi, Phak, Vo, Methan, marat mareng api keman asonsi pudam det lo. Pathi lot nangji lape kapethi ahut eri arvi pensi pathi nangji aron pinching det lo. Me-te kehui lake Karbi langpi along kethe keding pinpo, Habe, Sar lar rat det do an chepha si ok kephru asai angdeng deng. Bangso ok pru ok hung ahut si adai kedo vek apinso lapen arloso atum aphan chir pen tokbop po apran armut tekang det si lang kelo aron hako ahut pedo lo.
    Karbi akhei do an akur angbong amethang-methang anihu kangthir Karbi keplang ahut pen nangplang dun si nonpu arni anta dobom lang. Ingti asor anihu ke Timung asor henlo. Bey-kro, Terang asor anihu ke Ingti asor lo. Inghi asor anihu ke Timung asor henlo. Teron asor anihu ke Bey-Kro, Terang henlo. lapen Timung asor anihu ke Bey-Kro asor henlo.
    Ingdeng kre 11 (kre-isi) Bonghom Ronghang Karbi Recho lapen Kareng Teronpi Karbi Rechopi, keman ahut alanglitum kachinghonnei asopo amat si Jir kedam along Kursenem chetong nanglo. Karbi akhei kechari Recho mate alindokpo asopo amat ke apran amui ke-en ke chokchelo. Monit apran ke-en aphuthak aron lar nangpo pusi Kareng Teronpi Rechopi abang alangli chor Bonghom Ronghang aphan pinkhat lo. Achor Kareng Teronpi kapinkhat atengsi, Bonghom Ronghang Karbi Recho ta Jopang thang mathalo. Bonghom Ronghang lapen achor Kareng Teronpi amen pachekup lok si Rengbonghom pusi polo. Puthot adap Longri kre-hini kethe keding Karbi akhei do an Lindok po kapachingrum aphan matha ponlo. Labangso Karbi kachingrum amei aphan “Socheng Chongmeipi” pusi amen pathik lo. Karbi Chongmaipi along nangchetong dun abangphu atum amen puhelo,
    1. Socheng pen:- Rengbonghom, Lindok                Bangpli, Solangd.
    2. Killing Umchenai pen:- Lore Sarpo, Dok             Birikman.
    3. Dera Nokbare pen:- Kai Tisso, Kong                 Timung, Phankri Basiko, Chebi Basiko,              Acheng volos, Kramsa Artumpo, Keche            Bangpharo.
    4. Umaha Rapati pen:- Phusum
       Langhusum, Ser klenkli klenkli, Sar
       klenklon klenklon, Vopi pangdon,
        Dombalok.
    5. Habepi Chong Khili pen:- Cherok Bong
       kehang, Jor pangti, Bikathong.
    6. Umlarong Ronghang pen:-Veut, Nokbe
        kelu, Vehar, Sotar Basiko.
    7. Rongpi Rongcheicho pen:-Ikpi, Ikpo,              Vaipo Balong, Borchikong, Chelangming,            RongRongpharkong.

Angthun klangjilang…

2 Responses to Karbi akhei chepachor-cheparup lapen kachelir kopuson

  • Kardom
    Neli men Anil lekthe
    Nag li tm Inghi son 30 nag pachini thek a bag do ik g ma neli nag chonigri ik lo nag li tm ka do kave afan thekar alog ka cherap dun atm an afan ta chonigri lo kardom dome thak me:

  • Kardom akehai neli isi hini alam kachini kangtung do, eli karbi atum kache-en kache-do alam aputhak lijang mateh Engti (hansek) atum kropi ,teronpi van-noh pu ahok ma? lapen kopi ajoineh si van-no lo?

Leave a Reply

Your email address will not be published. Required fields are marked *

December 2015
M T W T F S S
« Nov   Jan »
 123456
78910111213
14151617181920
21222324252627
28293031  
Archives