ADVERTISEMENT

This area is available for advertisement. Please contact for details.

Arnivang
Get Adobe Flash player

Hamren Civil Hospital kapangkre KAAC Medical EM Ashok Teron aphan Hamren arat tovar cholang prong

Untitled Hamren: Hamren Civil Hospital (HCH) along kisung-keboi aphuthak klardak alamthe kachini pameji aphan Karbi Anglong Autonomous Council (KAAC) Medical a EM Ashok Teron Hamren Civil Hospital (HCH) an nangkahumri akenangsot do binong pusi Hamren Civil Hospital along seh kachelang bom arat pherangke angno ningje rinti.
Kedamtang arni ta Medical arpu kedo EM Teron asangho Hamren nanghumri tahai po lapen Joint Director of Health Services aphan ta nangchetoi tahai lo. Seta nonpu arni ta thangnat akachingthur asai ta kedeng lapen keklem angthek thek dun longle lang. Lapu-an aningkan angbong Hamren Civil Hospital along keso kachelangbom atum kiduk-kisung kachetong alamthe heihui ta EM Teron asangho aphan than pame thek po.
Non amat Hamren Civil Hospital along seh kachelang atum kethetan akisung ke doctor kadure hen lo. Hamren Civil Hospital aphan panongsi kado-kave bang 8 a doctor aphan appointment kipi tang dolo. Seta laso angbong pen non amat seh kelang a doctor bang kethom anvet. Alanglitum bang kethom vet angbong ta aning kehang alingsi asai (Duty) cheklem dam chot. Sonsi kenangsot apor (Emergency) ahut ta keso kelang a doctor abang ke dovek nangji, bonta Hamren arat ke laheihui avarsai anta long dun vangve. Kelongdun tang New Born Stabilisation Unit (NBSU) ta kikim patangtesi nonpu arni ta lapusi pado khangjang lo pusi Hamren Civil Hospital a Superintendent Dr. Sarma pherangke angno ningje. Ahem kikim ta bang kaprek kali, Medical Board Chairman barim Lipson Bey si kikim lo, seta patangtesi lapu pado khangjang. La-an chot ta kali, a signboard ta hini do, isi abang ke Hamren Civil Hospital lapen isi abang ke Sub Divisional Hospital puta dokok. Lasi kolo abangsi ke-en pone, lake klardak pen chini dunde lang puta ningjethu.
Ladak keso ahut men-men kenangsot puseta ambulance ta ave pule pudet seta henone athe hum ni ambulance kipi do. Seta kelang pameme (Maintenance) det ajok kenangsot ahut ke henodak, adang ingbop dak tahai pu heihui dover. Hamren Civil Hospital along seh kachelang dam atum men kachethap aloh ansi longchotji. Ladak kenangji ason dovai, ingprim pen danglok kaprek-kaprek ahormu anta keso kachelang atum amethang-methangsi kache nam nang saide.
Ladak nangketang a doctor atum anta kithirthip anghoi kachepalongji aphansi sai nangkachoklem chot ason. Kithirthip anghoi long dunlok lote pajo-pajo pen rongsopi kekat rintiji aphansi seradai-dui titi. Sonthak-thaksi HCH along kado-kave bang nerkep a doctor angbong non kedoling ke bang kethom anvet lo.
Hamaren Civil Hospital keter-kasa-ur chot ta kali, Superintendent Dr. Sharma abang kaike amat bhang kemong lapen hor araki ajok kachingki anta sungkrung pusi seh kachelang atum pherangke angno ningje rinti.

Leave a Reply

Your email address will not be published. Required fields are marked *

August 2014
M T W T F S S
« Jul   Sep »
 123
45678910
11121314151617
18192021222324
25262728293031
Archives