ADVERTISEMENT

This area is available for advertisement. Please contact for details.

Arnivang
Get Adobe Flash player

Professor atum aphan akoi kipi alam ahok kali: DGCTA

Diphu: Dr. N.K Sarma alamki aphuthak kaprek-kaprek birta aloh along kangdak aphuthak Diphu Government College a thanbang atum manghu prong lo. Athe bangso alam ke men-mensi dokok, lasi kaprek-kaprek abirta along DGC Professor atum aphan akoi kipi pon ke ahok kali lapen angkur kave alam pusi DGCTA chunbang pachetak.
Ahok alam ke, Dr. Sarma Diphu Govt. College along principal anghoi kangni bom ahut ongdung thanbang lapen charli osomar kachingki-chethan chetonte, la-an chot kali, ongdung atum aphan alangli patherak bom.
Alangli methang a college along loh kethan dun vek athanbang atum aphan ason-ason ahokhe alam akoi pisi anongjo lo. Alangli kechokche aphuthak aphong-aphong Diphu police station along lamhoi pidam lo, la-an chot kali alangli kechokche ajoine thanbang atum state government lapen district kachari ajakong kedo atum aphan aphong-aphong chetong damsi pinpur aloh pajirsi thanbang atum kisung kepho alam chepachini dam lo.
Ahok alam kachiniji aphan Guwahati Dispur, Higher Education asaikam pen ‘fact finding team’ atum Diphu Govt. College along aphong-aphong vang lo seta fact finding atum alamjai non puta paklangkle.
KAAC pen NK Sarma aphan chiklo jontrok pasang lo lapen Diphu Govt. College pen alangliphan toi etlo, seta HC pen stay order chevan thusi Diphu Govt. College along chingnithusi KAAC ahukum aphan kachepangbar lapen kachedan (challenge).
Pinpurme, NK Sarma Diphu Govt. College along principal anghoi ingni det pen kelang kapachingbarbe, ratchari kaparlo asapso vet alam penta thanbang atum aphan show cause notice kapale, kethak abidi keklem lapen khei alam pathesi ST/SC atum ke ne kengpak arum sido pu heihui alam kaningje pusi DGCTA a chunbang pachetak.
Kedamtang Paipai 11 arni ke alangli keklem kechokche ang-ang litpik anlo, athe ajahak charli osomar atum subject kachelarji aphan kachoningri aloh along signature ke-en damji aphan kedam ahut, ‘nangtum English a subject major en nangne athe thanbang atum thangta than thekthe pusi osomar atum aphan NK Sarma than dun. Puthot alangli kethan thuke, ladak kithirthip a thanbang bang hini vet, kaprek anke contractual lapen bang hini arloso athanbang atum English alam anta ningje thek pameme, la-an chot kali English asaikam along ketang athanbang atum English alam anta ningje thek pameme kosonsi English a subject kethan thek po?
Alangli kaningje alam osomar atum along pen longsi Diphu Govt. College Teacher Association atum kacheto dunde detji (non co-operation) mate loh kethan kangtonji aphan tongsekot cheparai lo. Athe alangli kachenek chechak un-eh det khangjang lo puta Diphu Govt. College Teacher Association a chunbang pangdak.
Thanbang atum ‘Pen Down’ asai kedengji aphan kacherai tang alam kachethan damji lapen laso a college along loh kethanji aphan akisung heihui alam kachethan damji aphan Paipai 13 arni DGCTA atum KAAC CEM lapen Higher Education a EM atum aphan chetong dam. Thanbang atum ‘Pen Down’ lapen kopi apotsi alang lapuson alam kaningjever ma aphuthak karju damji aphan kachingki damji aphan DGCTA atum Principal aphan chetong dam. Seta alangli lam karjuji aphan ning hanghe lapen ase chepathesi thanbang atum osomar aphan karchut lapen kaprek-kaprek asai kapadeng toi pusi alangli thanbang atum aphan akoi pi. La-an chot kali thanbang atum college along ratchari atemon nang kapalut, asanchom-sanchom kethak pu heihui alam akoi pi tekang pen ajahak arloso thanbang atum aphan ingbei tekangsi alangli hongbar plot.
Inut thanbang kehoi lapuson keklem aphuthak lapen arlosomar thanbang atum aphan kapatherak aphuthak aning pungsi thanbang do-an atum Diphu Police Station along lamhoi (FIR) kipi damji aphan damjui lo.
Police station along police pen kachingki bom ahutsi thanbang atum principal areng keso abirta kelong. Lasi professor atum aphan akoi kipi ke ahok kali lapen angkur kave alam. Lasi kiri katarlip amen pen madu athanbang aphan ta pasung longle pusi Diphu Govt. College thanbang atum ajakong kedo atum aphan choningri pusi Diphu Govt. College Teacher Association a chunbang Larim Taropi birta pangdak aloh pen pachetak.

Leave a Reply

Your email address will not be published. Required fields are marked *

August 2014
M T W T F S S
« Jul   Sep »
 123
45678910
11121314151617
18192021222324
25262728293031
Archives