ADVERTISEMENT

This area is available for advertisement. Please contact for details.

Arnivang
Get Adobe Flash player

MoS alam pen ratchari ale cho-en e: JACAS

Diphu: JACAS Advisory Board Chairman JI Kathar IAS (Rtd) aphan MoS alam pen ratchari ale kacho-en pura Paipai niphai 4 arni Diphu pen keklang ajahak abirta aloh along akoi kevan abirta JACAS asongja atum chethek long. Bangso akoi kevan ke kamatha damthap chot, athe ke JACAS ke MoS pensi Election kapathuiji mate kopene ale kacho-en iji aphan thang kamatha dam ave. Karbi lapen kaprek akheisomar atum aphan Sixth Schedule along ekethapi-eraikomchen ajakong abang aphansi JACAS ke kamtha dam lapen Sixth Schedule alamthe kemangdam ateng kapachunji aphansi JACAS kemang. Ningkan 15 sose apran kachethonrut khei lapen longri apharman kachesong ke lamso kali, lasi ilitum kaiketa arong kachevoitang lapen non kacheboche bom UPDS asongja atum lapen klembang atum aphan aman-apeng pisi choro bom lo. Kedamtang 2011 aningkan Phaikuni 25 arni kachetok alamdon Memorandum of Settlement (MoS) ke alanglitum apran chethonrut pen kachesong ale lo. MoS kachetok ke UPDS kachesong linja lapen klembang atum ale aphan anchot pu asonte ilitum maduta kachingchap dunprai nangji alam ave lapen chingchap dunprai ta nangne. Bonsita lake khei isi apharmansi kachetok pinak. MoS along jongsi Sixth Schedule along ekethap pi emethang aphan kachechari lapen kacheraikom ajakong kapabopji angkrak dokok pulote halabangso angkrak ingthin nangkokji. MoS along kachekroi alam kapachun lapen kapapleng ahut jongsi Sixth Schedule akarjong kapathilotji aphan kemang dam dokok pulote lason akemang dam abang ke khangdun nangkokji. Lasi MoS kapachun amen pen ilitum khei isi kisung kepho jokplot nangji aphan ke MoS kachetok atum labangso a MoS aphuthak kachingvai longsar atovar kethosi keme, kalite mo aphi akisung kepho ahut ke alanglitum aphansi koi pring po. Village Council ke thang akaheno ave, emethang adim ke Panchayati Raj ta thang akaheno ave. Village Council kalite Gram Sabha seng ra rong-rup angdeng anta chari-chalom ajakong pi ra kachingthur ajakong (MoS Clause 6.2) kapachelong ke akaheno ave. Akaheno ke labangso a Village Council mate rong-rup angdeng an chari-chalom ajakong kapaleji aphan keklem-kedam along kedokok abidi kanglim abangsi KAAC asor non malom Village Council keseng tong varet lapen keklem joi-joi abangsi kaheno lo. Lasi Village Council aphuthak White Paper paklangra Constitution along kolobangso a Article kalite Parliament kopi along Article atengsi Village Council keseng nangkokji ma, kosonsi Village Council kesengjima lapen Village Council keklem ajakong koson ma rat atum aphan pachini longra kachingvai longsar atovar tho nangji pusi JACAS pen hang lo. Kedo barim kheisomar atum Village Council kopi lapen komat aphan ma, Constitution along koloso Article mate Parliament lapen kopi Article atengsi keseng nangkok ma lapen Village Council ajakong koson ma la kado kave kachini long ajakong do lapen KAAC ta Village Council keseng aron kedeng aprang alanglitum kemang dam kopima hala rat aphan pachini nangji arpu do. Village Council keseng pen Sixth Schedule aphan akaheno ave det nangji, lasi JACAS aning kehang ke Village Council aphuthak kachingvai longsarji aphan White Paper paklang nangji pusi JACAS GAD Convenor Manoj Teron pachetak.

Leave a Reply

Your email address will not be published. Required fields are marked *

August 2014
M T W T F S S
« Jul   Sep »
 123
45678910
11121314151617
18192021222324
25262728293031
Archives