ADVERTISEMENT

This area is available for advertisement. Please contact for details.

Arnivang
Get Adobe Flash player

Krishna Rongpi a jadu non puthot Bakaliaghat along keklangthu: Robising Ronghang

Govt. of India Organisation life Development/Gramin Sanchai Achani Bank alar office of the Joint Director, Tribal Welfare Development Organisation Council, Autonomous Council under the Govt. of India pusi kelarthu

Dokmoka: Kedamtang penang aningkan pen Bakaliaghat angkang Haldhi Ati pu arong along kedodun inut Krishna Rongpi achor Kareng Beypi pen Anita Boro Teronpi pu alanglitum bangkethom chelangsi company mate organisation amen pen Karbi Anglong arlo penang-an adim Dokmoka, Dengaon, Dhentaghat, Chowkihola, Kolonga lapen Amsoi along company mate organisation ingpu lo.
Sai klembang mate voreng avarsai kipiji pu amen pen inut pen inut along Sika 50,000 pen 60,000 atangka enlo.
Rong arat aphan solar, KCC loan, business loan, tractor lapen housing loan heihui avarsai anta rong arat aphan kipiji pura penang arat atum along tangka suri-suri, lakh-lakh rung lo. Krishna Rongpi Guwahati lapen Delhi along lahai a fund endampo pu pachobaisi achiklo chiklo plengdet aphi ta lahai arat aphan varsai pithekthe lapen atangka ta chevoive. Alangli long kachongdat dun abangphu/phi atum aphanta achiklo bainong kipipe det ajok pamanghu prong lo.
Aphithu Krishna  Rongpi lapen achor Anita Teronpi (Boro) alanglitum bang hini ta Guwahati rongsopi Kharkhuli (Sagali kata) pu adim along kat lin rapjuisi haladak ta akaprek amen ki-ir dam ‘Office of the Joint Director, Tribal Welfare Development Organisation Council Autonomous Council’ pu lardamsi Karbi Anglong arat along pen kirung atangka heihui haladak arat mate ariso-ejang atum aphan amek palu. Riso-ejang atum aphan aning parungsi voreng avarsai amen pen lakh-lakh atangka rungsi lahai atangka pen Krishna Rongpi gari chenam lo lapen apiso-aso chepangreng-i.
Rat aphan Central a scheme, fund pu amen irsi joparni rat aphan chongthui bom lo. Lahai atangka alangli arideng along kedo-oh ajoine police lapen aron kangsai (Lawyer) atum aphanta tangka kipi undet ajakong kedo ajok kedamtang chiklo jonni aprang Krishna Rongpi lapen alangli risangho bang hini atum aphan BTC arlo Udalguri District Jail along thap det pen arnisi-nini aphi chepajok lo. Kaphereji kalisi non puthot Karbi Anglong, Bakaliaghat ahithi along bangso a saihem nang ingpusi inut bang hini arat aphan Tribal Welfare Development Central Scheme pu amen irsi Rongker athan, boundary wall, ringwell, thiri lapen kaprek-kaprek central a fund do pura non malom penang an abangphu/phi atum aphan percentage atangka kehang tirlap lo.
Robising Ronghang akoi kevan atengke, lahai central a scheme, KAAC atum keklem thekthe ajoinesi Tribal Welfare Development Organisation Council pensi klem ronglo pusi Rongpi asangho KAAC atum aphanta nongno jo. Lahai a bill ke joike pen CEM/EM atum along le-lepin pensi chiklo ejon angbong payment nangpi lapji pusi  Krishna Rongpi chechak.
Krishna Rongpi jongsi KAAC CEM/EM atum aphanta ajakong the munak pulote Dokmoka, Dengaon, Dhentaghat, Chowkihola, Kolonga, Amsoi arat atum along pen sika suri-suri lakh-lakh atangka pipotsi pini arni anta chipi thekthe det lo? Lapen alangli long kachoklem dun abangphu Gramin Sanchai Achani Bank, Govt. of India Organisation, Life Development Dokmoka Branch a Manager Robinson Rongpi alangli pini arni Diphu District Jail kedonangkok ke pi ajoine lo? Alangli inut athikjot, ingsamjin a-ot-adur kemesen abangphu lapuson kepho nangkok ke Krishna Rongpi kechokche mate lahai arat atangka kachipi thekthe ajoine lo. Lasi kado-kave arat mate non amat bangso Tribal Welfare Development Organisation Council, Autonomous Council along kachoklem dun abangphu/phi do an aphanta choningri lo. Athe nanglitum ta langdun pame penle kam klemduntu athe Rongpi asangho ajoine nelitum kedamtang pen non-anta kisung pen jok-un-e lang, nelitum kepho anta choklo. Nanglitum lapen kado-kave arat ta matha pameka penle sai choklem dun non. Ajatle punon Krishna Rongpi a jadu non puthot Bakaliaghat arlo keklang thuham ke manghumeme alam. Lasi sankur arat do-an seta bangso alam arsikjik mathapen langchari si kangsaiji aphan choningrilo pusi kisung kephovek abangphu Dokmoka Sildharampur Jeng Ronghang arong asor Robising Ronghang ketokjir pen birta nangpale.

2 Responses to Krishna Rongpi a jadu non puthot Bakaliaghat along keklangthu: Robising Ronghang

Leave a Reply

Your email address will not be published. Required fields are marked *

Archives