ADVERTISEMENT

This area is available for advertisement. Please contact for details.

Arnivang
Get Adobe Flash player

Langsun Athak Ingti arong along Malaria keso avur, inut kithi

Den Arong: Samelangso angkang Langsun angthak Babul Ingti arong along non malom Malaria keso avor ajoine bang 14 atum non amat malaria keso cholong rinti, laso angbong pen inut bang pran kedam nang.
Babul Ingti kethen kethan atengke, Samelangso pen Km 12 anbak kahelo lapen tovar kaheno dak ajoine tongsekot keso ki-un eh kachevangji aphan thetan akisung do. Inglong atovar kaheno gari motor kachelengle det ajoine keso chevangji puseta ju-eh charchongsi kachevang rinti.
Km 12 angbak akeng pen keso aphan nang charchong det aphi seta Samelangso along seh kachelang adim ave. laso ajoine Samelangso pen Dhentaghat along gari pen chevan thu nangji lang, La-ansi Dhentaghat seh Hospital along leji.
Non amat Langlokso lapen Samelangso arat kisung kethenei ke, Korkanthilangso alongroi along RCC adolong kaselam kapatangte lapen aprang pen rat kacheleng bom thengpi adolong kaphalangno et henlo. Dolong tangke akok kachelengji aphan kaselam adolong seta kemesen kali det ajoine lang kethek aphongtin kaheno, laso ajoine bangso adolong along gari-motor kapapar unji kali bike anta papar un-eh. Laso ajok tongsekot keso ki-un kacheponji aphan kisung thetan khangjang.
Laso ajok seh kachelang anamle sodak seta Dhentaghat along kedo a pharmacy alongsi seh chelang nangkok lapen ladak pensi ajat akeso seta chini pon long pusi seh kachelang api apo atum than.
Pherangke atum kahumri dam ahut kelong Malaria akeso kecholong bang 14 atum Babul Ingti arong asor, Ebina Timungpi (20), Rohila Beypi (25), Serjalin Timungpi (1), Hunmily Hansepi(13), Samuel Singnar (18), Samarin Tokbipi (2), Winson Rongpi (2) Rima Ingtipi (30) Brightlinglinson Rongpi (5), Sampri Singnarpi (6), Rakhi Terangpi (12), David Ingti (25) lapen kithilot abang Larlita Singnarpi (6). Kedam kevang kasiksak pen danglok ongdung akisung kedokok ajoine keso det atum ajat asai ta deng thekthesi manghu prong asonsi man.
Pherangke atum kahumri dam ahut rong arat atum kachoningri ke, Doctor atum amatle vang un-eh pusita kaprek kaprek atum arideng pen dovai biji nang parontha lapen keso ki-un eh pen kejokji rong arat atum choningri.
Lasi KAAC along okpran kelang chari a EM rong arat atum keso ki-un eh kachelangji aphan esonbak avarsai deng nangji puta rong arat atum choningri.

Leave a Reply

Your email address will not be published. Required fields are marked *

Archives