ADVERTISEMENT

This area is available for advertisement. Please contact for details.

Arnivang
Get Adobe Flash player

Rihing ameh kachethor ahok kave aphuthak KSA, HYDF kachesong

Diphu: KarbiUntitled Anglong arlo methang alongri aphan dorplup ameh rihing long seta rihing ameh kachethor long pame meme aphuthak Karbi Students Association pen Hill Youth Democratic Front atum ningkangsamse chepaklangsi Jakhong 7 Urmi arni Diphu DGM asaihem athengno Dharna ingni.
Karbi Anglong aphan dorplup rihing ameh pachethor long nangji, athe rihing ameh kave ajoine charli osomar lapen kaprek-kaprek asai keklem atum kasiksak thetan khangjang. La-an chot kali, saihem alongta meh kave ajoine ajahak asai ke apor ateng ketang thekthe do-oh khangjang pusi KSA ameiphu Robin Teron pherangke athengno ningje.
Karbi Anglong arlo aphan dorplup ameh rihing endet aphisi angtan aphan pale nangji, athe methang alongri along kelong ameh rihing kachethorji aphan bang kaprek along kehang thu nangkok ke therak meme alam binong puta Teron asangho ningje.
Lason ahut KANCH Electrical Circle a Asst. General Manager kaningje ateng ke, Langpi Hydro Project lapen Kopili Hydro Project along lang kijumhek ajoine kelong nangji ajakong ateng longle, laso ajoinesi rihing ameh dorplup pithekthe det lo.
Central Govt. pen kaselam Agartala Palatana, Namrup, Lakhuwa heihui along pen kelong ameh rihingsi Karbi Anglong alongta nang pale bomchot, seta pining aningkan ke arve kejang kijumpik ajoine lahai along kenangji ateng meh rihing ajakong longle puta alangli ningje.
Alangli kethan ateng ke, Langpi along pen 14 MW, Kopili Hydro Project along pen 49 MW ansi non alom rihing ameh longchot. Lahai rihing ameh ajakong Khalipara along palesi puthot Diphu along vanthuji. Lahai akisung ajoinesi Diphu rongsopi along rihing ameh kachethor akisung dokok puta AGM than.
Karbi Anglong arlo kelong ameh rihing ke penang an kethak adim do, athe Diphu along rihing ameh ajakong kapale phitji atovar ta ave puta alangli than lapen monit aphai kebatpik ajoine ta rihing ameh kachethor kasiksak along kacherap do.
Longri pen angtan meh rihing nangkok aphuthak alangli kethan ke, meh rihing asaikam atum ongdung kanahok kachepaplengji aphansi kaprek alongri aphanta jor nangkok, athe Diphu angkang mate Karbi Anglong arlo pen kelong amedu ke chokamar atum aphan bainong kipiji aphan anta dorde pusi alangli ningje.
Karbi Anglong arlo rihing ameh kachethor atumta medu pibom lo, jongsi mesen rihing ameh chethor longlo te la-an sose atum medu piji pusi kachesong asai kedeng atum ningje rinti. Lasi Karbi Anglong arlo jasemetpet Diphu rongsopi aphan rihing ameh dorplup pachethor long nangji pusi hang. Methang kehang ason kelongji aphan pini Jakhong 8 arni ta DGM asaihem athengno kachesong asai dharna ingthuji puta Karbi Students Association (KSA) pen Hill Youth Democratic Front (HYDF) atum than.

Leave a Reply

Your email address will not be published. Required fields are marked *

Archives