ADVERTISEMENT

This area is available for advertisement. Please contact for details.

Arnivang
Get Adobe Flash player

CCBRKA atum ahoi aphuthak Dharna kangni

Untitled Ahoi aphuthak Govt atum sai kedeng kapangkre aphuthak ningkangsamse kachepaklang CCBRKA atum kachesong kapangcheng

Diphu: Assam, Karbi Anglong lapen Nagaland ahoi along kedamtang penang ajir kiding pen Naga atum longle ahoi nang kepet aphuthak Jakhong 7 Urmi arni Co-ordination Committee for Border Protection, Karbi Anglong,(CCBRKA) atum Council gate athengno along Dharna Untitled ingnisi kachesong.
Kachesong asai along KSA, KSYC, KRA, USUKA, KUYA, AIKNA, KAIYA, KRAO, ADSU, DKH, DYO lapen AAGSU atum chingrumsi Karbi Anglong pen Naga ahoi alam aphuthak kechengsi kachesong asai kedeng. Dhansiri Reserve Forest kaparlo Rangapahar BOP, Daldali Reserve Forest lapen Shankar Tilla BOP, Kasiram heihui ahavar alom Naga atum chimitme pin pen aronre alongle nang kacheraisi hem-rit nang chikim.
Bangso ahavar along Naga atum risim rongrang aninghang aling kijui lapen longle chihutsi ahoi heihui along anta keton-kelang asai deng. La-an chot kali, ason-ason kachingthur asai kedengji phan JCB lapen kaprek ahormu chevansi tovar cheselamsi non apor anke chiri suri-suri alongle nang cherai.
Adung arai kedo arong atum avo-aphak lapen bi-chainong heihui anta kechopi anparta arloso kachelang heihui kaheno dak asai ta klem pusi Dharna kangni hamphang asong atum jong.
Karbi Anglong ingnam raikom asaikam pen kesom Forest pillar post no.17 ta Naga atum phurjoksi adung arei malom aning hang aling signboard parjap. Pinpurme Ex-UG Colony, Ex-IPS Colony, Hukhavi Colony, Yimchunger Colony, Rilan Village, Dikhoi Village, Ao-imkhong, Senlikum lapen Govt. of Nagaland Site for Horticulture pu amen chi-irsi longle nang cherai.
Lapuson Naga atum keklem thek longdak aphi anta Karbi Anglong kethe-keding, Deputy Commissioner, SP, CCF, CEM, MLA, MP, Minister lapen Director General of Police, Assam Chief Minister anparta Assam Govenor atum bangso alam aphuthak kekhang dunji aphan ardi pipe detsi chiklo jon 7 plengdet aphi anta thang kemesen asai  kedeng thek longle lang.
Pinpurme, kedamtang forest pillar post no. 17 angkang Naga atum aron avepin pen Karbi Anglong alongle nang keparlo aphuthak magistrate, Assam Police lapen Nagaland govt. atum chelangsi kelang chari asai deng. Laso aphi hin-hin state atum angbong kachingvaiji aphan mai ingni. Mai along Dimapur pen L. Lotha lapen Karbi Anglong pen Jyotirmoy Daimary atum jalinsi ardi dojot alamthe cherai.
Mai along ahoi atovar mate aronre ahoi nang chekap longle lo pusi chedonsar pen lamrai deng. Ahoi along kelangchari kapangtangji aphan patrolling lapen ingchin apaisong (wire-fence) ta ahoi along hing po puta cherai.
Kamanghu meme alam abang ke state hini angbong kacherai tang ateng nonputa govt atum isinat asai ta kedeng thek longle pusi  Co-ordination Committee for Border Protection, Karbi Anglong,(CCBRKA) atum jong.
Lapuson state atum ahoi aphuthak kapangkre lapen ahoi along kedo arat atum kisung aphuthak ningkangsamse chepaklangsi CCBRKA atum atumi KAAC gate athengno Dharna ingnisi kachesong asai deng.

One Response to CCBRKA atum ahoi aphuthak Dharna kangni

  • Ningdk meme alm lo la k krbaglong ahoi ng kthi k state Govt atm pngkreve ajoine lo c tame ngli tm chisng pangtng pon po pu c neli hin pn nigthe lo Kurvngthu nglitm kadokave asong aphn ta (neli zirikynding pen)

Leave a Reply

Your email address will not be published. Required fields are marked *

Archives