ADVERTISEMENT

This area is available for advertisement. Please contact for details.

Arnivang
Get Adobe Flash player

Inut Principal aphan terek un-et set a Autonomous Council ke kopi lo ale? KSA, HYDF

Diphu: Kacharvosai Diphu Govt. College a Principal NK Sharma aphuthak Karbi Anglong Autonomous Council atum thangnat asai kedeng thip un-eh det ke Sixth Schedule kaparlo Autonomous Council ajakong kangdei apot pusi Karbi Students Association pen Hill Youth Democratic Front atum jong. Sixth Schedule ahavar kedo Karbi Anglong pen North Cachar Hills arat atum separate state longle tik ke ahok Sixth Schedule ajakong chelongle.
Sixth Schedule arlo kedo Autonomous Council ke British akai ahut aphan chot, athe Autonomous Council aphan kipi ajakong ke anung pen che-en thu-et ta chok.
Diphu Govt. College a principal alamki ke, Iceberge asonsi angchun klangchun anchot. Lason thak thak alamki dopik khangjang lang, seta separate state longle tik ke lahai akisung pen chepajok un-eh. Sixth Schedule arlo kedo Autonomous Council ke apor kele (outdated) lapen asai kave ahormu asonsi mantang lo. Inut College a Principal aphan terek un-eh set a Autonomous Council ke kopisi ale dolang ma pusi HYDF pen KSA atum jong.
La-an chot, kali Sixth schedule ke state aning aling nang hijuk un lapen aning hang aling nang klem un. Autonomous Council ke Dispur along kachelar alingsi chelar dun voi nangji ke kaheno dak khangjang asai lo. Hini inglong alongri Karbi Anglong pen HC Hills ke kaike ta isi asaikam Assam government kaparlo HAD abersi kedo nang.
Hini inglong alongri along kedo inglong aso atum ahok ajakong pini arni anta chelongle lang. Inglong aso akhei, Khasi, Jaintia, Garo, Mizos, lapen Naga Sixth Schedule kaparlo ajakong aphan en-eh detsi separate state chepalong lo. Laso angthek ke lahai akhei atum prapjin pen chingthur lo lapen paprang dun lo seta Assam arlo kedo dun bom ajoine Karbi Anglong pen Dima Hasao arat atum pini arni anta paphi dunhupsi dobom lang.
Indian Constitution along kedo Article 3 separate state chunche tik ke Karbi Anglong pen NC Hill rat atum chingthur lapen paprang dun thekthe, athe Assam arlo kedo hini inglong alongri arat aphan separate state si kisung pen pajok unchotji pusi KSA ameiphu Robin Teron pen HYDF a sankur chunbang Joybabu Ingti atum birta pangdak aloh pen birta pachetak.

One Response to Inut Principal aphan terek un-et set a Autonomous Council ke kopi lo ale? KSA, HYDF

  • Ahok lo enut heno dak a principal aphan pulote terek vek ngpo nehin pen che don dun.son thakthak si Dongkamukam Rangsina Junior college along a principal aphan ta tarlip nang g lang.

Leave a Reply

Your email address will not be published. Required fields are marked *

Archives