ADVERTISEMENT

This area is available for advertisement. Please contact for details.

Arnivang
Get Adobe Flash player

Arnivang hormu ador kapabat aphuthak dharna kangni pensi kachesong

Diphu: Vosik niphai 30 arni adap porphai 11 apor Bokajan SDO (C) asaihem athengno CPI (ML) Bokajan District Committee, KSA, AISA, RYA, SYJ, KNCA, AIPWA, KSKA, AICCTU lapen KANKIS atum chingrumsi dharna kangni.
Laso ahut CPI (ML) Hills Party achunbang Robi Kumar Phangcho, KANKIS sankur chunbang Amlong Ingti, HPC abangphu LN Subha, saihem chunbang Gobin Tokbi, AISA Ronjit Kramsa, klembang Sobir Mazumdar, SYJ ameiphu Rocky Tokbi, KSKA ameiphu Rani Teronpi, AIPWA Nomati klembangphi Monalisa Tissopi, AISA Bokajan District ameiphu Anthony Kathar, KSA Bokajan District Committee chunbang Sar-im Teron lapen Sarlong Teron, Joy Kumar lapen Bapuram Singnar atum chetong dun.
Bokajan District Committee a chunbang Dilip Rongphar Thekar a pherangke aphan nangkethan atengke, BJP kejalin NDA akehoi Narendra Modi ni 100 asai angdeng kedeng along chiklo ejon plengdet aphita Karbi Anglong pen Dima Hasao arat ningkan 29 nangchesong det aphita Prime Minister barim Atul Bihari Vajpai kejalin ahut ason hemprek nangpi ponpe det lo. Non puthot Prime Minister Narendra Modi lethot ta BJP Assam State a meiphu Sarbananda Sonowal Diphu kevang ahut lapen kilik aprang Dokmoka along BJP National ameiphu Rajnath Singh ta det chari aron aloh along kedo Art 244 (A) ateng pen Autonomous State abang ke mo BJP government kacharli along dolo pulote nelitum deng pon po lapen nangpachun pipo pu alamchak nangkachechak pen puthot Karbi Anglong arat aphan nangpachobai-i lilo. Lapuson aphong-aphong Karbi arat aphan nangkapachobai aphuthak sodak pen pinprem lo. Athe Jammu & Kashmir a state along kedotang aron 370 pavedet nang po lapen Nihang-Nirep (North-East) alongta Nagaland state aron kedo 371 (A) 1 abangta paprai nang po pusi BJP government ningje bom lo. Laheihui asai keklem bom abang ke Anti People asaisi keklem pusi neli jong-jung pen pudamji.
Tangte penap-penapdik ke Modi kejalin a government atum Art. 244 (A) ta pave det nangji pu asaita dengde detji ma puta Rongphar asangho ningje. Sonsi arnivang petrol, diesel, LPG gas lapen kerosine ador nangkebat ajok arnivang kenangsot ahormu ador nangkebat lapen train kachethap anam kapabat ajok keboidet arat kerengji aphan sungkrung khangjang lo. Anparata Bharat adet along Official Language abang ke Hindi si pado lap nang po pu abang ke ilitum kapaphihup akhei aphan nangkeberji aphan keklem binong lo puta Rongphar asangho ningjethu.
Anparata rihing ame dover nangji, kijun alang arnivang piver nangji, Eastern Karbi Anglong College along Arts, Commerce lapen Science Streams ta pado lap nangji. Bokajan along kedotang CCI along aduk kekhang asai klem serak nangji, Kendriya Vidyalaya terek longle, Nagaland pen Karbi Anglong ahoi alongle raikom vek nangji pu akemang pensi dharna kangni alamta Rongphar asangho pherangke angno ningjethu.

Leave a Reply

Your email address will not be published. Required fields are marked *

Archives