ADVERTISEMENT

This area is available for advertisement. Please contact for details.

Arnivang
Get Adobe Flash player

Hemphu Keplang Atomo

Gobin Kathar (SGB)

    Hako kechengsi ako ke la non ilitum kedo prong apirthe ave pusi ilitum aphisar-phusar atum ethan. Songsar Richo, Hemphu Puthe-Pithe atum ke ha sining angsong Chiklolongso athak si kedo pusi pu.
    Lasi Hemphu Borma abangsi pirthe kimlo. Pirthe kim-rang tangdet aphi, inglong-arlok, langroi-langjeng, thengpi-thengprang sorjonlo lapen teke-ingnar, thijok-phakleng, saru-maino, votek-voso, sorjonlo. Bonta halahai amarat api atum adon-arap ave ajirpi-jirpo ave lapen Arnam-arni lapen Arnam-arni aphan kapachiniji amarat api sorjon nangjilang pu. Bonta halaso amarat kesorjonji aphan tasam-takot long athai ave.
    Hemphu amethang areptak ar-eh arepi chesatjok si marat-mareng sorjon i-lo, halaso amarat api henlo sumsi mate Karbi-karbak lo. Karbi-karbak sorjondet aphi Hemphu puthe puthot sining angsong chedam thujui lo.
    Karbi-karbak atum chanri-chanjai dolo. Bonta kerai komji abang maduta ave. Lasi ha sining angsong Songsar Recho atum Arnampharo atum chingvai-chingsai lo athe Karbi-karbak aphan komatlo kerai komji?
    Arnam pharo atum pulo, nang Hemphu puthe si Karbi-karbak aphan sorjonlo lasi Karbi ke nang si raikom dam nangpo pusi Songsar Recho, Arnampharo atum pinkhatlo.
    Songsar recho atum kapinkhat ateng si Hemphu Puthe pirthe nangsunlo, bonta pirthe athak ke suva-suti do-o, longle kangthir ave Hemphu dongvong angkrak ave amat puthot sining chedam thujuilo. Pirthe suva-suti kechamji aphan Hemphu abang temon arve pha si pirthe cham ingthi lo.
    Pirthe suva-suti cham ingthi-et aphi Hemphu lapen Rasinja jirchekle banghini Karbi-Karbak aphan keraikom aphan ha sining angsong pen pirthe nangsun lo. Inghun arve padonkam si alanglitum pirthe athak nangsun lo. Hemphu lapen Rasinja Karbi arong vangve ako alanglitum lang-kumphang aroi amang si chington lo.
    Hemphu Karbi atum pen kachetongji aphan isi abidi klem lo. Lang-kumphang aroi-arai isi kethetan arong do, halaso arong amen ke Miring-morong pusi pu. Miring-morong arong kedo Borli-eh asopo aphan isi akeso palonglo, halabangso akeso palonglo, halabangso akeso kapameji aphan penang an seh langlo sonsuri adovai pilo, bonta keso ke meme det lo. Keso abang lang a-ok si kacho ar-i pu, lasi Borli-eh abang lang-kumphang aroi ok ridam lo, ok ribom ahut isi ser ason doi-et atur akitur bongpi achehe rok-rak long loklo. Borli-eh ta labangso achehe alon do-ong amat hem vandet lo lapen ok ta penang an longlo. Keso abang aphan ok pacho lo, lapen ha ajo apor Borli-eh amang heman lo Hemphu lapen Rasinja aphan.
    Hemphu pulo, “Borli-eh nangso keso mepo nang thang ta matha nangne lo, nang kamatha chepasungri nangtum sonsuri akisung keboi, keso ke un-eh, avur-akrem pen nang kapajokji aphan si ne Hemphu Puthe lapen ne ingjirpi akibi Rasinja pini nangtum along kevanglo. Lasi netum non lang-kumphang amang si do apot penap adap ingthang lote nang ingthum non, Karbi-karbak keraikomji aphan netum rong-rup nangdunpo” pusi Borli-eh amang thek longlo. Borli-eh amang kaheman alam rong-rup a sar aphan lapen mekar aphan anta than si Rangmukrang asomar Longmukrang lapen Bangmukrang atum korte banghini ta Borli-eh along dunsi Hemphu aphan ingthum damlo.
    Borli-eh, Longmukrang, Bangmukrang lapen mekar atum lang-kumphang amang an le si Hemphu Puthe Rasinja Arnampi pen chetong lo. Hemphu lapen Rasinja arje akele me pik-pik pusi Hira-mukuta asonsi atur turbong-bang anpin lo. Borli-eh atumta pusi amek patamjuri-et lo.
    Hemphu lapen Rasinja Karbi-karbak arong nang dunsi Borli-eh aso keso ta langdam lo, Borli-eh aso keota men-men medet lo, lapen rong-rup tebok-terai atum kisung-keboi, keso-ke un-eh do-an ta me-et lo.
    Hemphu Karbi arong kevangcheng ahut rat atum Hemphu kapadoji aphan ihum a hemkangthir kimpi lo, halaso ahem suva-suti do tahai mene pura suva kecham aphan vo alo ejon nangji pusi Hemphu pulo.
    Arbung-arphe pangthir-et aphi Hemphu lapen Rasinja ta Karbi arongsi dodun kok lo lasi non pini arni anta ilitum Karbi akhei atumke Hemphu aso pu cheparoka-i longpop lo.
Hemphu kelongcheng adim:- Lang-kumphang amang.
Hemphu kelongcheng abang:- Borli-eh (Borli-eh Ingti) Ingti asor
Lang-kumphang:- Lang-roi amen.
Miring-morong:- Karbi atum rong kikimcheng mate rong keseng cheng arong amen Miring-morong.
Songsar Recho:- Arnam an akethenai amen
Longmukrang, Bangmukrang:- Rangmukrang asomar amen (terang asor).
Suva-suti:- Kangthirthe aphan.
Sumsi:- Karbi.
Hemphu amen:-
    Hemphu lang-kumphang amang pen si Karbi arong kevang alangli langmang pen kevang amatsi alangphan langmingpo puta pu lapen vo nangji pu kepu amat hemphu aphan Vohangpo puta pu lasi la soni amen pacheroppet si Langmingpo-vohang.
Phi kethe, phu kethe
Oi puthe
Oi Pithe
Sum kethe
Sowai kethe
Onso kethe
Monso kethe
Onso men
Honso men
Oi puthe kangtang
Oi pithe kangtang.
    Hemphu aphan kethok kejir cheng mate karkli cheng abang amen ke Borli-eh pu henlo. Borli-eh ahem along Hemphu aphan keru-kethai ahut ok-han chebak-et choji dok-dok apor Hemphu asomar kave lapen keche atum pladunpli lo. Kecho-kejun ahormu kedo an ason ta chebakthai lo, van kechodeng alo an ta ikthai lo avedet lo. Lasi Hemphu amethang avan ar-eh anathu ingsekplak si Kave lapen Kache aphan pilo, lapen ok-han ta kebakbe ke avedet lo, lasi choche-junje aprang anuttin avan pen hor-ok han rungsi Hemphu asopi kave pen Kache aphan pilo, lasi lahenlo Hemphu athekar keplang lo.
    Kave lapen Kache lake Hemphu asopi lo lasi Karbi aphan keraikom along Kave pen Kache ta ta cherap-cheto dun lasi Peng Hemphu karkli, chojun-choku ahut ta thekar dokok lo. Hemphu dolote thekar ta dolo.
    Hemphu athekar amen:-
    We thekar
    Che thekar
    We lore
    Che lore
    We lobo
    Che lobo.

2 Responses to Hemphu Keplang Atomo

  • Kardom Kathar asangho. Nangli hin pen Sumsi-Sokarbi nangkeplank atomoh ili Karbi alam pen kapangrum- kapangcho ajok. Jutang aputhak moh moh ta lapuson asai deng pon iksi klem pon ik bomji pusi ning the-ik lo.

  • Hemphu keplang puke ave
    tok thap aret ri komarli
    Hemphu ke Arnam
    HEMPHU PIRTHE NANGKAHUMRI PUJI
    HEMPHU KE PLANG PLE LO…..
    AKO CHOK LIM LE TOK NON
    ANING KERE PEN TOK RI ARNAM ALAM KE

Leave a Reply

Your email address will not be published. Required fields are marked *

February 2013
M T W T F S S
« Jan   Mar »
 123
45678910
11121314151617
18192021222324
25262728  
Archives