ADVERTISEMENT

This area is available for advertisement. Please contact for details.

Arnivang
Get Adobe Flash player

1971 aningkan kilik kehai un-e Karbi asongja atum Karbi atum aphan Autonomous State kapelong aphurkimo

Jones Ingti Kathar, IAS (Retired):

Karbi atum aphan ahokpet pen chinghont si, penang-an a Karbi asongja atum 1971 aningkan Karbi Anglong aphant Autonomous State vandet lo. Autonomous State kapelonglok a temo, thihek pen, lapuson. 1954 aningkan thekmuchot inglong aso a Songja atump Tura along thedung a mei do si perai lo, Assam arlo halabangso ahut kedo Inglong a district an papaphrang nangji pulote, Assam arlo dodedet nangji. Lasi Separate State kehang ji aphant isi phurkimobent akaperai (historical resolution) endet lo. Songja atump Lushai Hills district, Khasi Hills district, Jaintia Hills district, Garo Hills district pen chetong dunt lo. Halaso a meeting along kaperai ke inglong ta thoi ta kedo tribe atump aphant an si Separate State kehang lo, kecheng ako keh. Aphithuchot ke, All Party Hills Leaders’ Conference (APHLC) sengdet lo. Captain Williamson Sangma aphant President lapen Mr. G.G. Swell aphant General Secretary bat lo. APHLC a symbol ke mir apu pen arvo epak. Kaperai atengsi, kaprek a tribe a leader thoi, inglong atump aphant an ta parju lo. Halabangso ahut Karbi Songja Raidang Ingti, Basa Ingti Kathar atump Shillong dam si Captain Sangma, Mr. Hoover Hyniuta, MP (LS) , Mrs. Bonlily Timungpi (Khongmen),  Ex-MP,  Mr.G.G. Swell, Mr. B.B. Lyngdoh, Mr. Darwin Diengdoh Pugh, Mr. John Manliana lapen kaprek kaprek atump aphant ahut hut pen chetong damp bomp titi. Athema, Shillong si Assam a capital. Karbi student atump Shillong si lokacharli kidun chengbomp ahut lo Mr. Harlongbi Ingti Kathar, Mr. Samsing Teron lapen aphithu Mr. Bapuram Singnar, Mr. Longsodar Ingti Kathar heihei Shillong Karbi student atump Hills Leaders atump pen Separate State kehang alam long dunsi, Mr. Raidang Ingti, MDC, Mr. Basa Ingti Kathar, Mr. John Kathar, Mr. Davidlong Inghi, Mr. Barelong Terang, Mr. Moniram Langneh atump along lam pelelo. Mr. Harlongbi Ingti Kathar, student, Union Christian College, Umyam Mr. Hoover Hynnieuta, MP (LS) of Khasi-Jaintia Hills and Karbi Anglong-N.C. Hills aphant Deithor anta ponsi Karbi election kehai kalidet a songja atump aphant Separate Hills State alam pachingki lo. Hadak si Pitor Tisso ta chingrum aphant Separate Hills State alam pachingki lo. Hadak si Pitor Tisso ta chingrum dun lo. Alangli tump kedo-an APHLC join dun lo. Kejoin dun 1958 aningkan tahai. Alanglitump aphi, Mr. Bapuram Singnar, Mr. Longsodar Katharson (Ingti Kathar), banghini student ta Shillong pen Graduate atump APHLC join dunsi Separate Hills State kehang aboi pethe dunt lo. La aphi Mr. Gandhiram Timung, Mr. Protap Chandro Tokbi, Mr. Song Beh, Mr. Nihang Teron, Mr. Harikanto Ronghang, Mr. Sonaram Terang, Mr. Harsing Taro, Mr. Thong Timung, Mr. Sara Ingti Kathar, Mr. Moniram Rongpih, Mr. Rongpih Lamding (Hongkram) lapen Karbi do-o atump APHLC along lut dunsi armu chejengk, armu cheto klempik lo. Karbi Student’s Association kedo-an abangphu atump Separate Hills State kehang along dun-lap lo. Police atump theng ta theng-o lo. Mr. Rongpih Lamding, cycle pen ingting rimrim apor ahemp kachedamp ahut Hongkram along komatneh Separate Hills State aningk kedokde atump ingchin apump pen anung anat aphu dhengdak si pithilot lo. Mr. Raidang Ingti, MDC lapen Mr. Basa Ingti Kathar ke APHLC Central Executive Committee a Member apotsi alanglitump ke APHLC Executive Committee a meeting an ta ha Shillong si meeting dun ver. Aphi thuke Mr. Longsodar Ingti Kathar lapen Mr. Bapuram Singnar atump si Central Executive Committee a Member. Central Govt. along kachingki damp ahut Mr. Longsodar Kathar ke APHLC a team along inut Karbi Anglong pen a Member pusi dunver ha kijut agreement kachetok ahut an ta. Captain Sangma lapen Hills Leader atump an Congress Party pen che-o-et lo. Captain Sangma ke Assam HAD a Minister pen ta che-obup lo. Captain Sangma atump Kokrajhar adungk Serfanguri aklamp along public meeting along Bodo atump aphant choningri si Separate State kehang along nangcherap dun nont pulo. Assam a Minister Mr. Rupnath Brahma lapen kaprek Plain Tribe a songja atump aphant ta choningri damp lo. Seta alanglitump Separate State nangneh pukok lo. Lasi aphi ke Separate Hills State si hangchot lo. 1962 aningkan MP, MLA lapen MDC election do rappet ahut Karbi APHLC asongja atump an ta Separate Hills State aphuthak si election chedan dun lo. Karbi Anglong ke Congress atump hai-et lo. APHLC a candidate ke Mr. Raidang Ingti anat lo kehai dunt. APHLC atump 1962 General Election Mr. Basa Ingti Kathar, Mr. John Kathar, Mr. Barelong Terang atump an ta haidunt dedet lo. Election aphrang pen kacheperai tangk ateng si, APHLC pen kehai atump an election det aphi MLA pen che-o-et lo. Kadokave bang sirkep. Athema, Hemprek si kehang tangdet lo apot si, Assam Assembly along ke ingni duntde lo pukok lo. 1965 aningkan neli Class isi vet Khasi student akur, Wahlang, ajo ani aphant All India Radio office pen kachingthum dunt ahut, keche atump nokjirso pen apok chutlut si pithilot lo. Inglong aso Hemprek kehang apot keche atump aningk thipik si Keche chonghoh atump si Calcutta pen gunda vansi la aphant kapithi pusi halabangso ahut lam klang. Shillong arongsopi hurchodut lo. Government atump kechengsi aphong army vansi curfew pidet lo. Kithi kepon armu chejengk thepik, Captain Williamson Sangma, Mr. S.D.D. Nicholsroy, Mr. B.B. Lyngdoh atump si kejapon G.S. Road kengkeng.. Ingsamp-ri aklikklak doset. Police Bazar along Army Commander howangk pi si, army kedo-an salute pidunt. Ningduksi kelangdunt armu plengset. 1968 aningkan a election ta Mr. Raidang Ingti si  APHLC pen haidunt chot lo. Mr. Longsodar Kathar, Mr. Bapuram Singnar, Mr. Barelong Terang an ta hai dunde det lo. Laso malomp, Assam kedo keplangk muchot akhei atump, inglong aso aphant keber kachechak un-e apot, Mizo atump ke jakong pen thurphlut nangji pu lo. Lasi Mizo atump ke Mizoram aphant det si hileh pen kachedan klem thurong si APHLC pen che-o dun bup lo. 1968 aningkan India Government methangsi Khasi, Jaintia, Garo, Karbi lapen N.C. Hills lapen Assam atump aphant Federal Structure Hemprek pidet lo. APHLC atump dengdet lo. Seta Assam keche atump inglong asor atump pen kapachingbar apot aningk thipik si, Federal Structure dengde det lo. Halabangso ahut, India Govt, isi proposal dengde lote kaprek proposal Assam pen APHLC atump aphant kepi titi apot birta alo along cartoon klang pik. Kijut ke 1971 aningkan India Govt, methang si United Mikir and North Cachar Hills, United Khasi and Jaintia Hills lapen Garo Hills aphant isi Autonomous State pidet lo. Article 244(A) pinching si ilitump aphant Autonomous State, Hemprek nangpi det lo. Halabangso ahut an ta, election along kehai un-e Karbi Songja lapen KSA atump APHLC along si do si Separate Hills State kehang chitingdun phrat lo. Karbi Anglong ta Hemprek longdunlok lo. Seta democratic a det ke, election kehai atump alam si Govt, atump arju nangkok. Hala ahut, Mikir Hills District Council pen N.C. Hills District Council lapen MLA aphant kilik along kehai atump ke, Hemprek ta nangneh, Separate Hills State ta nangneh, Autonomous State ta nangneh pusi, Keche atump pen chelangking si Hemprek Kehang atump aphant ke ingnekchoi thurong lo. Khasi atump along kilut dunt pusi alanglitump aphant putot pik lo. Karbi atump ningkan pharo ko-an tanglo Keche atump arum kilut duntang, lake chechininedet. Mikir Hills pen N.C. Hills aphant Autonomous State dengjima dengde ma, District Council along 1968 aningkan a election along kehai dunt kedoan a MDC lapen MLA atump aphant mei ingni ra perai nont, pusi India Government atump pulo. Lasi Mikir Hills kedo-an a MLA, Minister lapen MDC atump meeting dolo. Meeting along Autonomous State kevanvek Karbi a Songja atump angbong Mr. Raidang Ingti, anat meeting along kangni dunt long, athema alangli ke Member of District Council. Election kehai Arleng kethe atump angbong ke, Mr. C.S. Teron, Minister, Mr. Dhoniram Rongpi, MLA, Mr. S.S. Terang, Parliament Secretary atump hei hei helo meeting keja pon. Alangli tump Karbi Anglong aphant ke Autonomous State nangneh pusi meeting along perai det si, kaperai  aloh (resolution) Government aphant lodet lo. Kelong tangdet a Autonomous State ke dengvek masi lo pu meeting along kepu abang ke Mr. Raidang Ingti, MDC inut vet. Aningk oipik si Mr. Raidang Ingti, MDC ke meeting along pen damjui lo. Interim government along Mr. Longsadar Ingti Kathar aphant Minister, Agriculture and education si arpu kepi, seta alangli deng longledet lo. Khasi pen Garo APHLC asongja atump Karbi election haiver asongja atump Autonomous State nangdeng dunnont, kethedung Minister arpu ta nangdeng dunnont pulo. Seta Karbi election kehai asongja atump abangsi kroikredet lo. 1958 pen 1971 an Hemprek kehang lapu-an chepedukdet pen Autonomous State vandet aphih, election haiver atump kevantangdet a Autonomous State varchor apot, puthot arni, kevan kachepeduk Karbi a Songja – Mr. Raidang Ingti, MDC, Mr. Longsodar Ingti Kathar, Mr. Bapuram Singnar, Mr. John Kathar, Mr. Basa Ingti Kathar, Mr. Barelong Terang, Mr. Song Beh, Mr. Moniram Langneh, Mr. Moniram Rongpi, Mr. Gandhiram Timung, Mr. Dorsing Terang, Mr. Nihang Teron, Mr. Lumjong Kathar, Mr. Resolu Rengma, Mr. Thong Timung, Mr. Jonathan Ingti Kathar lapen kaprek kaprek Hemprek kehang rappet Karbi lapen kaprek Inglong aso atump lapen Karbi Students’ Association abangphu dopik atump, Autonomous State vardet puthot arni Diphu rongsopi along, pe ki-ik achet (black badge) chepivur si doklip pen akidingpi armu chejengk damsi aningk kiduk chepeklang lo. Gauhati pen birta alo along peklang lo, “Sok pen plangk pik Mikir Hills Assam arlo kedo bom ji aphant perai lo”, (Rice rich Mikir Hills opts for Assam) pusi tok lo. Autonomous State kevar atump aphant “More Power” si nangpipo pusi Assam Govt, atump halabangso ahut chongthui lo. Department 12 tahai pi lo. Agreement chetokte, notification pen si pi chot. 1958-1971 pen 1986 pen non an Hemprek kehang a keprek ke lahelo – 1958-1971 abang ke Khasi, Garo atump pen Karbi atump chelangpet. 1986 pen ke Karbi pen Dimasa atump chelangpet si kehang. Inglong aso atump an kachelangpet ke, lang-un-eh pik si, ‘third force’ atump Inglong aso hijant pachepithi seroi si, ningkan 40 aphrang kelong tangk a Autonomous State ta pachelongthu thekthe detlo. Kelongtangk a Autonomous State si ili puthot hang thu nangbom lo. Aphrang Karbi atump thekthedet ahut aningke, Govt, atump ilitump ta Hemprek cheja thekpo pu echini si, Autonomous State ekepi tangdet ke non ilitump thek muchot lo apot, la ekepi thuji aphant thang ta kisung ave. 1971 aningkan Autonomous State dengdedet aphih an ta, election kachedan dun hai-un-edet APHLC Karbi asongja atump ke duk det apot si doklip ason lo; seta Karbi arat atump pen chingrumchom aling ta Karbi atump aphant Hemprek nangji puke chethan ver lang. Hemprek aphant aningk kehangk ke asap ta thithe det lo. Nonke ako kethe thu lo. Halabangso ahut, Indira Gandhi, Prime Minister lapen alangli government lapu-an Karbi atump aphant kachini lapen kanghont, manghu meme. Election haidunt un-epin seta, Karbi atump kadokave ta Hemprek aningdok lapen Karbi atump aphant keberhet ra kapatherak adim pen ingthur si monit ateng papereng long nangji, pu Mankedopik Indira Gandhi, Prime Minister of India chini peme lo. Lasi alangli Karbi atump aphant ta 1971 aningkan Autonomous State, Hemprek pidet lo. Kehang atumpavepin le ekepi kali. Kehang si kelong lo. Student ahut neli amat ta cherap dun long peme lo.

Leave a Reply

Your email address will not be published. Required fields are marked *

February 2013
M T W T F S S
« Jan   Mar »
 123
45678910
11121314151617
18192021222324
25262728  
Archives