ADVERTISEMENT

This area is available for advertisement. Please contact for details.

Arnivang
Get Adobe Flash player

Assam Electricity Board a medu kangbo

1 Guwahati: Assam State Electricity Board (ASEB) atum aphi ong medu chelongle ong asonsi theklong. Medu kelongle alam ongdung sub-division pensi kelong dam. ASEB ahin pen kapachini ke, state angkang ongdung sub division along medu aphuthak keklem tap do. Ajahak ke computer along pene kelar doji, seta madu ta pu thip thekthe komat tong lason asai keklem tahai pone pu. Lahai a board along koan a medu tong kanahok lone inut nat ta kaningje choklim ave. Latum pen kapachini thu atengke, Bill kaselam lapen customer arideng aloh kipi ji aphan kedamtang 2005 aningkan pen computer pensi klem pangcheng. Lapen Golaghat sub division elongvet si medu kanahok Kuti  5 atangka do. ASEB pen laso aphuthak inut computer ke-ot abangphu aphan FIR pi. ASEB pen akoi kevan ateng ke, laso amonit laso amonit  doan sub-division a bill  kelang arpu do lapen bidi langno asai keklem along ta kacherap dun do, laso ajok medu koan ma kelong nangji longle det pusi alam paklang.
    ASEB pen puthot kapachini ke, jongsi Bill along kopene kechokche do pulote laso kapakengji aphan sub divisional officer lapen sub division a sub manager revenue aphansi password pachini chot. Aron ateng pulote jongsi laso Bill kapakeng nangji do puseta alam doan bi vet kenangsot, seta non abangke lahai asai keklem along komane computer chut dun tap jam ajok penang medu nahok det lo. “Laso alam along penang alam keklang doji. SDO lapen sub manager revenue atum anut kaprek amonit aphan laso a password pi det tahai, kali puseta mane password inghu bor-i abang do tahai,” pusi saiphu kehoi atum pangdak.
    Ahut pen lason alam klang klang, inut bill clerk lapen meter reader atumsi Bill kaselam along kelar alam keklang. Asitin asaiphu ta methang methang arpu do rep,  lapen jongsi komatne methang arpu pen akele keklem do pulote lake aron karkan binong pusi ASEB ahin pen alam paklang. Jongsi komatne abangphu/phi Bill along kechokche do lapen pakeng nang ji pulote laso amonit isi aloh tokjir pen SDO aphan pachini nangji. Laso aloh long det matik ke SDO ta lason Bill kapakeng asai deng un-e pu. Consumer atum methang aron chechini nangji jongsi Bill along kechokche chiniji pulote.
    Laso Bill kelar tap kekhangji aphan ASEB pen  the SDO doan aphan password kelarji aphan pachini. Saiphu kehoi atum sub division doan humri dam pen lahai aphuthak patarlip toi.  SDO atum aphan aron ateng kekroiji aphan hukum pi lapen arpu kave amonit along password kapalele detji aphan sodak pen pachini. Jongsi mane bidi langno keklen angthek long lok pulote sodak adai enji puta ASEB ahin pen pachetak. Halapu, Assam State Power Workers Union pen Bill kaselam tap along kacherap dun atum aphan adai en nangji pusi kehang pado. Laso aphuthak song ahin pen ASEB a chairman aphan pinpur aloh pajir.

Leave a Reply

Your email address will not be published. Required fields are marked *

July 2012
M T W T F S S
« Jun   Aug »
 1
2345678
9101112131415
16171819202122
23242526272829
3031  
Archives