ADVERTISEMENT

This area is available for advertisement. Please contact for details.

Arnivang
Get Adobe Flash player

Rongbongghat Model Hospital kikim along EM atum kahumri dam; Patove Rongbongghat Model Hospital ahemai bang 9 atum KPLT arideng pen jok etlo

IMG_6148Diphu: Nonhet jong KPLT atum Balijuri Model Hospital lapen Deithor Model Hospital kikim-kerang along kachongdat dun abangphu atum aphan kenep kanghu pon det aphuthak klardak alamthe kelong damji aphan KAAC EM i/c Medical Ashok Teron, EM i/c PWD Raton Ingti lapen EM i/c Water Resources Jivan Chandra Pathak pen-pen Deithor Model Hospital an humri dam.  
    Deithor Model Hospital an pale damde aprang kechengsi adap porphai 10:37 apor Deithor (MPHC) ‘Mini Primary Health Centre’ alongsi pale papranglo. Laso ahut Deithor MPHC a Dr. Biren Chandra Gogoi kachepahemphu amai si malomso apharman mai ingni. Mai along man-peng pen kachetong dun alohi atum aphan Medical Staff pen archo. Laso ahut MPHC along kenangsot nai-nai ahourmu nangpi nangji pusi tokjir pen Medical EM Teron asangho arideng choningri aloh pajir dun. Kenangsotnai angbong pen staff quarter hum 10 selam thu prui nangji, akimi quarter hum 10 nangji, laso angbong pen Nurse lapen Pharmacist atum aphan hum 2 panong nangji. Seh kachelang ahem ta selamthu prui nangji, bang 2 Medical asaiphu/phi anghoi papleng nangji, bang 2 Pharmacist, Mali bang 2, Chowkidar 1, DHAI anghoi Kave Terangpi aphansi pi nangji, kithirthip Ambulance katevar abangphu anghoi non kedobom Welson Langneh aphansi pek nangji, gari-motor kapasang ahem selam nangji lapen a Power ke-ong generator Hospital aphan pathik nangji pu heihui hangdun lo.
    Bangso aphisi Rongbonghat along kikim bom (DMH) ‘Deithor Model Hospital’ along pale dam thulo. Kedamtang arni Rongbonghat Model Hospital ahem kikim kachongdat dun abangphu lapen Balijuri Model Hospital pen pangthek thekthe klempar atum kenep kanghu pon det aphuthak aningduk lo. Rat pajoike nang lapen Deithor ahavar ta pachingthur dun nang pu kamathasi ladak seh kachelang aphan mesen avarsai nangkipi along nangkapatikuk dunji aphansi keklemthap asai langno lo. Lasi kachingthur, rat lapen ahem asor atum aphan mathasi kenep kanghu pon abang det atum aling seta prapjin pen thangnat aduk-alak pipe pin pen nangkelo serakji aphanta choningri alamthe rat nangchepaklang dun rinti. Rat aphan mesen lapen kejoike avarsai kipi along nangkapatikuk dunsi lason kenep kanghu asai langno kachoklem aphuthak ningduklo lapen madu asong atumle lason choklem seta aprang pen esonbak alamthe nangpale paprang nangji apotlo. Non abangke thangnat alamthe paklangkle pin pen lason men-men kenep kanghu pon detke ning duk meme lapen kachingthur, rat kisung-keboi aphan kekhamkhe lo. Lasi prapjin pen do-an abangphu aphanta aduk-alak pipe pin pen nangkelo serakji aphanta Medical EM Teron asangho choningri alamthe chepaklang.
    Inglong atok-ano kedo arat tobokhet seh kachelang ahem ave pu mathasi govt. pen Deithot ahavar arat aphan varsai kipi si Model Hospital kipi lo. Bangso Model Hospital kikim-kerang tang dapprang lote seh kachelang aphan heloving-ving an pon nangnelo pusi kamatha pen penang an ning arlonglo. Bonta kedamtang arni thangnat alam ave pin pen Balijuri lapen Diethor Model Hospital pen pangthekthethe klempar atum kenep kanghu pon abangke ning duk meme. Rat lapen ahem asor aphan pasungse pinsi parpjin pen nangkelo serakji aphan PWD EM Ingti asangho choningri.
Deithor Model Hospital pale det aphi, Chokihola Primary Health Centre anta birta palele pin pen men-men humri dam. Laso ahut ahoi arpong, seh kelang ahem selamthu prui nangji, staff qaurter lapen mesen kijun alang avarsai prapjin pen pi nangji pusi Chowkihola PHC a Dr. Medical EM Teron asangho aphan nangpachini dun.
    Kaprek-kaprek seh kelang ahem kahumri patang det aphi, EM i/c Water Resource Jivan Chandra Pathak lapen EM Raton Ingti, Ashok Teron atum Chowkihola, Bhitor Kalani Shyam arong an humri damthu. Kaliani alangroi lang kethe ahut inghan kanglem lap ajok adung-arai arat kedo-kethak kisung kachingtang nang alamthe long dam. Lasi rat aphan mathasi bangso ahavar parpajin pen longle keraikomji aphan Bolder Pitching paselampo pusi chechak tekang. Laso ahut Joint Director of Health & Family Welfare B.C Sanglary, NRHM Programme Manager Pranjit Kumar Dutta, VDC Chairman Hari Ingti atum pen danglok penang an man-peng kedo-kethe kiding atum chetong dun.
    Rongbongghat along Model Hospital kikim ahemai bang sirkep aphan patove porphai 10:00 apor malom KPLT arideng pen jok etlo. Birta ateng, laso hospital kikim adung arei kedo arat pen danglok kachehoilok asanchom arong arat kachoningri ateng si alanglitum ok pran mephun pen hem nang pachele lo pusi pherangke birta longdun. Birta ketok apor ahut anke kenep pondet ahemai atum inglong angsong pen nangsun bom lo.

Leave a Reply

Your email address will not be published. Required fields are marked *

April 2012
M T W T F S S
« Mar   May »
 1
2345678
9101112131415
16171819202122
23242526272829
30  
Archives