ADVERTISEMENT

This area is available for advertisement. Please contact for details.

Arnivang
Get Adobe Flash player

Arphek ador kisun ajok rat kaningri, ale anke Moholdar ajahep dam-et

2Umswai: Piningke arphek kachotiki arat atum kaningri aningkan. Ningkan hini aphrang hem chotai along amat le chojor dunta ilin along Sika. 35-45 an long. Shillong an salon lote ilin along Sika. 50 pen athak longdam. Bonta pining aningkan abangke ilin along Sika. 20 anvet ajok kenam atum dure detlo. Kopi doma pu Thekar pen katarlip dam ahut rat atum kaningje mate kipu alam la aber hen lo.
        Arphek ador ke ephong atengte, ador sunpo-arlupo, lake aronlo. Chuning pen arphek ador la-an meme lapen pining lethotta la-an meme. Bonta Shillong pen Guwahati ahithi alongke ador nangsun seta la-an nangsun -o-e lang. Bonta ladak moholdar kibikok ajoksi angtan pen kevang abepar keklem atum ador keso pen namhai vangvedet. Athema moholdar atum amethang atum ale long-o nangji pura medu kirung mate pabat varet. Non amat Shillong along ilin Sika.35 an long, bonta alin tin alongsi Sika.7 an endun det ajok bepar atum ladak ilin Sika.20 anta kenamji aphan un-edet lo. Athema gari anam, gate along kipi lapen moholdar atum aphan lahai tudet bangdet aphike ale ave detlo pusi ongdung atum aningkangsamse alam nengje hur.
        Bangso aphuthak KAAC kachari atum kamatha nangji akenangsot dolo puta ningjehur. Suri-suri arphek kachotiki pen kachepangreng atum aphan matha damde pin pen inut banghini a moholdar atum aphan kapaplangchot asai ke KAAC pen klemkledet asonte me-oji pusi rat atum ningje rinti. Athema medu seta moholdar pipepin penseta kachojor lapen katiki atum along pen amat rung dun lote KAAC apuru along medu lepo pusi ongdung atum nengje rinti.
        Meghalaya govt pen rat aphan matha damsi arphek ke ingnam ahormu (Forest Produce) pu lakha khedetsi katiki ahormu (Agriculture Product) pu lakha detsi rat atum aninghang aling chojor-cholang long lo. Forest Act 2005 ateng pen pulote Scheduled Tribes atum aphan ingnam ahormu semar pen aninghang aling chojor-cholang pu aron ta pathik lo. Lasi non kevangji aningkan pen ke mohol kapapi longledetji aphan KAAC aphan un-an pen angtang pidamji pusi rat atum pherangke angno ningje rinti.

Leave a Reply

Your email address will not be published. Required fields are marked *

March 2012
M T W T F S S
« Feb   Apr »
 1234
567891011
12131415161718
19202122232425
262728293031  
Archives