ADVERTISEMENT

This area is available for advertisement. Please contact for details.

Arnivang
Get Adobe Flash player

Nilo kithur ajok kisung kepho arat aphan kerapji KAAC chesik lo ma?

Ladak karbi Anglong ke sai kachotiki aphan arve aphansi cholangding nangkok.Arve jongsi apor ateng pen nangjang pulote bangso aningkanke botor mesen pusi pupo lapen cho-e chosom ason do-anta mesenpo.Jongsi arve nangsun derklui pulote longle anta kreng etsi ke-e, kesom ason anta kreng khrai khruisi thi-etpo. Hidi alongle anta kreng-etsi sokta cho-e longledetp. Lason aningkan  soksang kelongta jumdetsi soksang kadure pen akhim nang thurphlut taha. Lason hakoko penta dobom. Lasi halabangso a-ove mate aningkan ahut akhim kithur pen rat atum kisung kepho alam ilitum nonpu anta chethan longbomlo. Lang kethe, nilo kithur pen akaprek kaprek botor bokan kahingno ajok rat atum kisung kepho non kai kimi ahutta chinglum pik. Bonta non akaike Sorkar ahin pen lason aphan kerapdun asai mate abidi kedeng pon ingtang klong ajok aphrang phrang rat atum ko-an kisung katora kachetong nonke la-an pho lapen chetong jokphlot asonl. Karbi Anglong alongri nilo kithur alam aphrang phrang penta arju longbom. Bonta lahai kisung kepho arat aphan sorkar pen kerap pon kethe dung pu karju dun long ave. Kedam tang anke kopai kime  asonlo. Athema lahai aniloo kithur punon lapen langkithe punon angkang thethedet.Konantne ahavar angkang ansi dochotchot.Bonta lason mo aphi nangchiplangpledetji pu ilitum puthip un-e.Lasi akisung pen kapijokji aphan aphrang pen kachisik ponmek dosi kime.Arve jangje te ilitum alongri sai tiki longle.Arve jangje seta sai kachotiki arat kachotiki kanghoi amo thangnat katikukke detji aphan hidi lang kipi (Irrigation) sai pangtang pon pime nangji.Ilitum alongri hidi alongle the-o. Ladak hidi lang kipi mate sok katiki aphan lhidi lang minta nangne pin pulote non ko-ansi ilitum alongri nengkan isisi soksang kelongma la-aphan phankep an nangkam jilang. Bonta non ke arve aphan chotonlok ajoine nengkan isi angbong sok ephong ansi tiki longchot lapen la-anta arve  kido anengkan ansi tiki longchot.Bonta lang jongsi minta jokphlot pulote nengkan isi angbong batai hini  an sok tiki longpo anke longri arlo sok kelong aphaita batpo.Ahok pen  langdam lote Karbi atum sai kachotiki pen lokta plangphi-un mate chokam ahin chingthur dun-un. Nihang -nirep englong alongri angbong Karbi Anglong helo soksang keplangnei alongrilo pusi bang atum pulo. Lasi KAAC pen bangso alam kamatha pon parsik asonte rat atum ale long-oji.Kidamtang anke bangso amo KAAC mate sorkar pen kiklem pon pangkreve asonsi theklong.Irrigation asaikam pen kapiklang alokimo(Record)atengke Karbi Anglong arlo hector surikep ahidi adang aphan langpipon bomlo puhelo.Lapen bangso asai kapichun aphan kuti suri phli-pho an atangka pidam tanglo puhelo.Ahok alam abangke irrigation alangteng kikim pon lapen hidi alangkhar kihut pon angthek ke kitheklong adim menang ando bonta irrigation asaikam pen kipi alang pen katiki asok kachorot long atum pangrumpet mon pharo isi asok anta avelang tahai.Irrigation asaikam kopi apharmansi kibi ponchot?Lake lang kave ahidi aphan lang kipi lapen areve le jangje seta kachotiki arat atum phlutphle pin sai kachotiki longji aphan.Bonta kidamtang anke Karbi Anglong a Irrigation asaikam asai kideng pon anke rat kapilangji aphan chot,  songja lapen contractor atum aphan kapiplang asaisi dengbom chot asonlo.Athema kachitiki arat atum ahidi along langlenon lele non lahai akam apharman ke kuti-kuti atangka ke pidam tanglo.Contractor aphan payment pi-etlo.Contractor atum along pen  lahai akam kipi anam songja akehoi atumta longdunlo. Non Karbi Anglong ejahak ahavar along niloo kithur pen rat atum kisung pu alamsi menang arni pen chithanseilo.Niloo jingsi thurdut pulote lang kave ajok hidi alongle kreng-etpo anke sok cho-e longlelo.bangso akisung oen kapijokji aphan KAAC pen hini abudi cheparedeng pon asonte me-oji.Isi abangke lahai kisung arat aphan tangka lapen akaprek kaprek kirengji avarsai prapjing pen klem pon nangpo lapen thirklong abudi abangke niloo kithurver ahavar pangthek ponsi dorphlup an hidi lang kipi ponji aphan thedung asaimek(Schemes) heihui deng pon serak nangpo.An lote niloo le thur seta rat atum hidi asai kachotiki amo thangta sung nangnelo.    

Leave a Reply

Your email address will not be published. Required fields are marked *

March 2012
M T W T F S S
« Feb   Apr »
 1234
567891011
12131415161718
19202122232425
262728293031  
Archives