ADVERTISEMENT

This area is available for advertisement. Please contact for details.

Arnivang
Get Adobe Flash player

Honuman pen Karbi akhei chehoman

Baliram Teron:: Karbi akhei ta la-an kelang me-meh akhei ke kali bonta amenasi chepalang me-meh varet, kethekthe varet puta kali, kilu varet puta kali. Pirthe along kopima kethekdun long klemji pulote klemdun thek. Athe hako phurkimo along do, British kachari ahut mate nangkacherai  ahut North-East anatthu kevangcheng ahut Karbi atumke arongtin ta hele do. Anutin ta hele semarthek, lason theklongsi Areng kelok atumta manghuhak lo. Lasi latum mathalo, ladak North-East angbong ke la Karbi akhei henlo aphu kangchonei atumlo. Lasi latum aphan palu bub titik kt netum chohai-un-e pu mathasi kapaluji abidi rilo. Laso kapaluji lepu tangte Hor pen Kani henlo pura Karbi atum aphan kani kecho abe-inghoilo lapen hor kijun abe inghoi lo. Laso aphike Karbi atum hor, kani pen ajok areng kelok a sorkar mandet lo, kaphinkhat alingta kroidun varet lo. Kani le cho lote monit akithitang ason ajat ta matha thekthe, hor kijun lote kaphere katherak ajat ta ave, lason an kaheno ahormu kecho abe inghoisi British atum Karbi akhei aphan sorkar ke-en long. British atum aphan India pen plungjui aphi ansi monit atum kithitang pen kacherengthu ason amek nang pranglo. Laso aphisi kani keseji aphan kachesong pangtang lo, laso kachesong ajoksi non kani pen chepajok unlo. Bonta Hor abangke nonpu ta chepajok un-e lang, bang kereset akhei atum ke hor pen kachepajokji aphan isi a dhorom pinchong detsi hor aphan jun kartang  pura keseji aphan pathiklo, lake Christian a dhorom henlo. Naga atumke kereset akhei pinaksi hor hor kirimre adhorom alongsi khei isi amat ta christisn akhei pu chipudundet lo. Lasi kachingthur anatthu ta North-East angbong ke Naga atumsi litchot lo. Lason thakthaksi kereset akarbi atumke hor kese adhorom mate christian along kidun atumta do-o lo, ladak dhorom penle keme kelangno pu kipudam alam kali. Illi Karbi atumta hako penta karkli-kaphejo ahut seta hor kenangsot, bonta hako ke hor ke Arnam aphansi sik-dang pichot, monit atumke apo chobe po junprui lasonsi vichot. Non malom ke karkli-kaphejo, pangri-pangdon pulote Arnam pen anpar monit aphansi ane patherong. Hor kijun longji aphansi kidunchot nangnak cheplangdet, lahai mathadam et pensi hako amonit atum heloving kachechar mo aphi kephoji alam matha dam-etsi enut-banghini kethek kere atum hor ane pathe nangne pura hor-arak pavir nang pu aron kithik abangta dolo, lake akehai Bonglong Terang henlo. Bonglong Terang akisam ke hor arak pavirlo pura pachethang lo, bonta pejo-pejo pen arat aso atumta kroi vangve detlo, Non ke hor kepa-ong abangsi chihung thurong lo. La-anchot ta kalilang non abangke pangri-pangdon punon karkli-kaphejo punon hor ke-er si ane pathe lilo. Hor ke monit kamatha aphu atarlok phanghodet puke majokta chini, seta chinidet apphita ane pathebom tangte illi kereset akhei chipujima? Hor ajoinesi bangphu kilik ahut ta keme-kaheno, kethek-kethekthe asongja chongvai pame thekthe, komat asongjasi hor-ok, tangka, poisanang kipi ke-ong ma halaphansi songja keme pu hokrong. Ladak henlo illi Karbi atum khei aphan pachingthur un-e det athepi ke. Hor ajoine si kethe-kiding anokbe ta kithi-i hurlo. Laso angthek ke Thong Nokbe aphanta kapathi asonlo. Hotur aphan paremji pulote hr pen henlo, lasi bang kethekser kona aso atumke Karbi akhei aphan kedongthip pen paluvokji arisim ke hor pen ok henlo pu chini-etsi apor apor ahut lote hor-ok pen abaidet titilo. Chinilor enle chinine pu kachekrong pulote Arnam sita arap un-e , monit monit hijan alongle chesongdun thekthe ,amena ahormu le bang ethipondet pulote lake amenasi kechokche lo. Arnam ke monit pu akhei aphan anta kipi pachetangreplo amenasi kachirimdun thekthe apotlo. Longri-longpat anta arnam ke epirep lo bonta nang kechokche ajoine, ne kechokche ajoinesi chirim-chibi thekthe detlo. Siningta dak henlo pirthe ta dak henlo, arnamta dak sido, hi-i ta daksi do., lahai ke majokta manghudam nangne. Karbi akhei pen Honuman kachinglit puke lapuhenlo, Ramayon atemo kachini abangsi ongji pavon (tomon) aricho asopo henlo Honuman puke. Braman sining longle angbong pen kangtang nei ke sonthom vet lake Meh, Tomon lapen Lank, la sonthom ajoinesi Braman mate pirthe ta kedochot.Lasi Braman pu aphansi Brahmo pulo, meh,lank,tomon la sonthom cherappet pensi Braman kedochot ajoine si Bramo aphu kethom kedo ke lahenlo. Laso tomon aricho amen ke povon pulo, laso a povan aso henlo Honuman puke. Pirthe athak pen kangtangnei ke honuman henlo, lasi hoito juk ahut Ram Avotar, ahut ladak pirthe angbong ke Ravan henlo kangtangnei pusi pirthe arat aphan ke dongthip lo, aning hang aling monit aphan cheneklo. Arnam atum lahai theklongsi laso kachipindak kong a Ravon aphan kapavirji pura Ram Avotar pinchongsi Ram aphan pirthe nangtoi lo, bonta arnam atumke thangbak be ke kapathiji aron ave lasi Sita aphan sorjonlo, bangso ajok Ram pen Ravon chepholo. Pirthe akangtangnei aphan braman along kangtangnei Honuman aphan nangtoisi Ravon aphan pathilo. Ramayon atemo ke chethanplirji pulote jothom-nithom le chethan sita jut-un-e. Karbi pen honuman kachinglit puke lapu henlo honumanta Braman angbong akangtangnei  lo sipu ahut penke chetengnedet titi, illi Karbi atumta thekser-reset atumta do-o bonta amena akethek kere ason chetengnedet titi. Laso aproman ke pining kedamtang electin mate kilik kachepatedun aphurkimo henlo. Karbi atum 90% ke MoS nangji pu kekroi atum angse lo lapen 60% ke PAPA aphansi vote ta pilo, 90% vote kepalongle ta PAPA asongja atum amena angbong cheron-chebak kethekthe, mate cntrolled thekthe apot chot,kali pulote 90% a vote ke kelongvekji apotlo lapen Council chari chelarvekji apot lo, lasi rat pen songja angbong akechokche chepu athai ave, rat ta kechokche do songja atumta kechokche do. Ravon pen Ram ron thama chedanlo, laso ahut Loxmon aphan thai aso roklok lo. Laso kapameji aphan Bibison abang elong adim inglong alongsi dovai do pura thanlo, laso adovai ke-en damji aphan Ram si honuman aphan toilo. Honuman ke kangtangrak ajok ajat arju pamemesi halaso dovai kedo anglong lengphit lo, bonta hadak ason-ason abap kedo-o ajok kolo abang tong dovai lone pu thekthe detlo.Halapu ta keder lolasi abidi jut ongsi Ram aphan aning arlo pen arju lo. Ram pulo lapu tangte a inglong amat vandet non. Honuman abang manghuhaksi pulo, hei Ram kopusi la-an anglong kethele kevan un poma pulo, Ranm pulo honuman nang nangmena aphanta kachetengne apot lo, nang ning chematha damtha nangke povon aso Braman angbong kangtangnei abanglo., nang oso ako arni aphan thesere kitin amat joilut abang lo, Braman pangtingthip abang lo. Arnam pharo nangchoningrisi arni aphan nangchele thusi non pu nonbenta chiklo arni kedo chotlo. Tangte laso a inglong chotke kopilo? pu Ram abang thakthusi Honuman ta aprang aoso ako alam chemathadam lo. Hok tema pirthe ke akangtangnei ke ne henlo, pu chichinisi laso a inglong nang phurplut amat vandet lo. Lason thakthaksi illi Karbi atumta kethek kere abangta do bonta chepatujoi lasi kethek kere atum anta nangcheklang nangpo, kali te Karbi akhei kevirji angringsi dambomlo. Kona aso akedongthip verji aphansi bangke kachithik bomlo,Karbi atum anta non anke nang ning kachepharloji apor nangle tanglo. Karbi akhi nang kele atangka poisa Karbi hijanle chipi nang,keklemta emenale klem nang kechota emenale conang. Kedamtang ason keklem ta bang kecho ta bang pu ason ke chokche, hotur ke bang akhei kali hotur ke illi angbongsi do.Emenata henodak pulote bang aphan kasorsar chot ke kopi ale, lapulo tangte kheisi virbom po. Ale ke bangsi longbom po, lasi ening chepharlo thu non thek-kere, bokbe do-anta nangchepaklang non, pi apotsi Honuman ason kangtang chetengne detlo.

Leave a Reply

Your email address will not be published. Required fields are marked *

March 2012
M T W T F S S
« Feb   Apr »
 1234
567891011
12131415161718
19202122232425
262728293031  
Archives