ADVERTISEMENT

This area is available for advertisement. Please contact for details.

Arnivang
Get Adobe Flash player

Kachelang selet amede kethur; Doldoli along edonvet bang 3 aphan pran karmut, Dokmoka 1, Hamren anat bang 2, Gari pen 1

0Diphu: Karbi Anglong along atumi lapen atumidik kachelang selet pen kithi bang throk anaparta enut Motor kachingkoi pen apran kedam abirta langno longpon. Panini angbong kachelang selet lapen Motor kachingkoi pen bang throksi amonit apran dam tanglo pusi ketok kelang ahin pen kithi aphai kalakha kapado alam pachetak. Phakuva rong kachevit upchit ahut Diphu rongsopi pen chehoilok Doldoli ahavar Joshep arong along kachelang selet pen edon vet bang kethom aphan pathi lapen ningkan phli arlosos Dipali anparta chiklo jon 21 aphan pran karmut ji aphan katengkheng pado. Honi arideng  pran kedam atum Babul Mahani, apiso Rina Mahali lapen ningkan 14 ariso Dipok Mahali pusi keton kelang atum pangthek. Babul Mahali  ningkan phli asopi lapen chiklo jon 21 pinsoso ta areng keso penan-an ahir dolo. Areng keso ahir ketan aosomar aphan Diphu Civil Hospital along si se kelangji aphan amen thap dam. Keton kelang lapen pherangke atum honi kepho ahem along kahumri dam ahut komat tong kapathi lone chinine pusi Joshep bosti rongber-rongthak amonit atum birt ke-ap dam atum aphan pachini. Babul Mahali ahem phakuva-rong kapathu ahir kachipi ke angtan pen angtong arju dun long, bonta ajo koson tong Babul lapen ahem asor lapen asopo aphan kapathi lone chini dunde puta birta ke-ap atum birta longdam. Kapathi ahem arlo hor, ok, an kecho angthek ta birta ke-ap adilung atum longdam.Keton kelang banghini aphan ingnang si arideng chevan. Karbi Anglong a S.P Bhokta  Bahadur Chetry adim langdam pen katarlip asai pangcheng. Hor kejun pen honi atum kopi athe tong Mahali atum aphan apran karmut lone, laso aphuthak chinine lang seta longle alam pensi kapathi pon puta S.P Chetry ningje. Halapu Dokmoka ahavar Godavari arong ta aponu aphan ku pen takbob pusi ladak birta nangpale. Birta kahumri long atengke Kamal Bosumotary amethang ahem T.V langbom ahut anung pen Bosumotary a ik asopo anung pen menmen ku pen katengkheng ajok thanbang Kamal Bosumotary apran damjui lo. All Bodo Student Union (ABSU) rap -meiphu barim Bosumotary aphan katengkheng ahut arnikangsam methang akam kacheklem kachelang det ajok thanbang ahem asor lapen asopo- asopi atum katengkheng ahut thek dunlong vangve puta birta kithilot Bosumotary ahem asangho atum pherangke aphan pachini. Aponu aphan kapathi ariso aphan Dokmoka a Police atum ingnang si hem kangsam along thap si aponu aphan kapathi athe ri bomlo.Hamren Sum Division anat ta kacchelang selet pen inut aphan apran ke-en abirta longponthu. Rengbeng Ronghang arong Chondra Tokbi aphan Lunse Milick katengkheng pen angphun ke-en abirta ta Thekar apherangke along birta nangpale. Lunse  aphan ta rong asor katengkheng ajok apran en det pusi birta chetak. Lunse kithi arpum rong asor konat tong kevar lone longle lang, Police atum kiri kakoruk asai padobomlo. Diphu pen Manja adak truck kachingkoi pen Letjulal Thenglu (30) kithi abirta ta longthu.

One Response to Kachelang selet amede kethur; Doldoli along edonvet bang 3 aphan pran karmut, Dokmoka 1, Hamren anat bang 2, Gari pen 1

  • Karjudun long anta neli ning runhup an pin kopisi anset baksi laso arnisi pet arni le puan honi kepho nang aret ma rat atum.Pirthe along non ahut monit amoilo pave detlo,monit enut aphan apran ke en ta marat mareng kethelot anta ave det asonlo.Lasi neli jungjung kamatha dam ateng ke Sorkar ahin pen sodak an step en nangji bon, monit aphan apran kamut det atum aphan hem kangsam an kethap damchot ke ning ingsam dunde lapen mo non phi ta klem hai abang do bom ji.Lapen anut kaprek atum ta klem dun hai bom ji.

Leave a Reply

Your email address will not be published. Required fields are marked *

March 2012
M T W T F S S
« Feb   Apr »
 1234
567891011
12131415161718
19202122232425
262728293031  
Archives