ADVERTISEMENT

This area is available for advertisement. Please contact for details.

Arnivang
Get Adobe Flash player

Homs Baba Amr ahavar aphan Red Cross pen kerap kapale, arongsopi pen kapathiji si kethai pusi kahonthe

0DAMASCUS: Syria armu-okso atum chiklo ejon an chari kekroikre arongsopi Homs aphan kekom pen bomb kapaklo dam aphi Homs rongsopi along kedo Baba Amr asanchom aphan Red Cross kachejeng pen kerap pale lo. Bhomta arni adonvari alongsi kerap aphan kenangsot ahormu do lo.
       Red Cross lapen Syria a Red Crescent chelang si hum throksi a truck pen kerap ahormu pon lo, areng keso atum aphan dim pen katerekji aphan ta chesik. Rongsopi along kedo asanchom Alawite Kurja aro, president Bashar al-Assad adhorom kanglum adim ke Syria armu-okso atum tumprapre.
      Kedamtang hithiruini pen penang an chari ajakong atum katumpra ajok hemchardon lapen hem jongjung ta meh kecho, kanghang, kangbop lapen kiru ajok penang an atum ke kisung, areng keso, kithi-kejang pho nang lo.
      Chari kekroikre Free Syrian Army (FSA) pen Theman arni kapachini ke "kachedanthuji aphan non ke dim ke-o" tekang lo pusi pachini. Seta ihin pen kelang dun atum kahonthe ateng ke nini nithom angbong rongsopi amonit atum aphan Syria armu-okso atum arongsopi pen apran ke-en etji aphansi kisik pusi kahonthe.
       Kai ateng pulote Baba Amr along kedo amonit aphai bang 100,000, non ke penang asuri anvet lo, angton pen kithi et pen kejokji aphan kereng an atum aphan dim pen pon det lo pusi FSA pachini.
      Lahai angbong Homs along "kapherememe pen monit atum aphan kali-kalang kapathi" abirta kelong pusi UN High Commissioner for Human Rights ningje. United Nations Security Council along Syria along monsam lapen chari kekroikre arat aphan keraiji aphan jakong ketoiji aphan lamrai kedengji aphan bor-i lo, seta UNSC along kithir anghoi kedo atum Russia pen China chedon dunde det.
       Mamascus along kedo tekela asaihem Britain aphijong Bhomta arni France ta tekela asaihem kachingkir lo pusi President Nicolas Sarkozy pachetak.
Agence France-Presse news agency aphan kepon ahormu ke "kecho ahormu, thengkur (dovai), peh-um, kong-er atum aphan chulang lapen khoroi-boroi," pusi Syria a Red Crescent sai kedeng ahin kelang ajalin Khaled Erksoussi pachini.
      Damascus pen kebar a truck atum kedam kanglen lapen Homs along ke him keklo penang an arthat. Homs kele pen Baba Amr kedamji aphan Red Crescent sengme rapbang lapen ambulance cheto dunsi pachejeng po.
       Syria a Red Crescent akehoi pen kapachini ke Baba Amr kedam longji aphan ke pachii lo, seta kopinene ason amung do lang pusi pachini.
Ahin dim along kedo atum ke meh chethor longle lapen kenangsot ason anta ave det lo lapen areng kedo atum si ke-ong lo pusi ICRC kahonthe.
      "Jongsi ahok-ahak pen kachedan le ington tang lo pulote dim along keleji aphan kebeng-kephan ke ave det nangpo" pusi Sean Maguire, ICRC lamjai sarpo ningje. Lasi jo-parni le sai kedeng ahut kejokvan do po puta bat dun.
       "Neli arisangho Syria a Red Crescent klembang atum Homs arongsopi along arnivang si kecho ahormu keron dam lapen lason thakthak si nelitum Baba Amr alongta klem dam po pusi ningthe lo."
         Areng keso, kangchir, kalang-it banghini France pen pherangke banghini Edith Bouvier lapen William Daniels atum Homs pen Lebanon kat long lo, hudak pen Bhomta arni si France aphan rot ahem pen kangjar pusi France atekela asaihem ningje.
        Bomb kevar along Bouvier areng keso dun ahirtan pik. Kikim khraikhrai pherangke atum birta kapangrum amandu aphan kedamtang arui Syria armu-okso atum bomb kevar dam along banghini apherangke apran dam lo, hulaso ahutsi bouvier ta areng keso dun.
       Arpum hini Britain a Sunday Times aphan sai kedengpi Marie Colvin lapen France pen mohor kenep pherangke Remi Ochlik, longlo lapen Damascus pale et lo, hudak si komat atekela asaihem aphan si kahodei nangji ma hodei po pusi pachini. Kaprek pherangke banghini Spain pen Javier Espinosa lapen Britain pen Paul Conroy atum ta Lebanon kat longchit lo.

Leave a Reply

Your email address will not be published. Required fields are marked *

March 2012
M T W T F S S
« Feb   Apr »
 1234
567891011
12131415161718
19202122232425
262728293031  
Archives