ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Anglong a segun kapakrep lang kili ateng

Diphu: HTisso Photo India mate Bharat adet angbong penta Karbi Anglong a District kethe ke hini angdeng along sido dun lo. Bangso angbong pen Karbi Anglong aphan Inglong kangtui, Ingnam angdang kethe pen danglok akaprek ason kelong aphan kalakha pado. Karbi Anglong ingnam kethe pen ajok penang-an tomon keme mate Atmosphere me pik. Bangso angbong Karbi Anglong a ingnam alon kido-i ke sekun pen henlo mate Karbi Anglong a sekun pulote Guwahati, Kolkatta chot kali Mumbai along anta chini pame lo. Setame Karbi Anglong Autonomous Council (KAAC) pen kangtang kring karaikom kipipe det ajok arni vang ta sekun rongpharo sose krep nanglo mate sekun kekrep ke lang keli a teng lo. La-an chot ta kali arnivang si Dimapur anathu ke hum phokep sose a truck a sekun pale lo. Non ke Diphu arongsopi adung arai along anta sekun athengpi kethek longji ke ingra veng po. La pu-an a sekun kapakrep kipon pendanglok anta Forest Department lang dun ding ason si thek long. Thek dun long lok ta thek dun longle det ason si Forest a Department cheplang thu rong lo. Ajat punon mane mane Malwari, Ranger, Forester, Forest asaikhi keklem lapen akaprek atum anta Karbi Anglong a sekun pen ajok Crores sose atangka cheselam longlo. Mane mane ke sekun pen hem kethe chekim long lo. Lason bom pulote Karbi Anglong a sekun kevirji ke arni ding-o-e lo mate non ningkan hini kethom angbong amat si vir det po.
    Pherangke pen penang-an a ingnam kahumri dam ahut kethek long ke sekun anglong pen amat pa ruhup pa ruhup si thek adam long lo lapen tovar adung arai anta rok pon lap ason si thek long. Adung arai    kedo arong arat aphan karju ahut nang kethan dun ke “Aprang prang ke sekun athengpi ponji pusetame ajo apor si kanghu pon pon. Setame non ke lapu kali lo ajo pupe adap pupe truck van ham po kirok lo, kethap lo, kipon lo” puta nang pachini dun.  Anparata netum bangke adung het pusetame sekun athengpi kali atheng anta cho-en dun thu long le puta rong rat ningje thu.  “Lapuson pachington tepin kapakrep pulote arni si ke sekun pu thengpi Karbi Anglong pen amat si virkok po mate ave det po” puta inut banghini kethek kere atum ning pado.
    Karbi Anglong a segun rangkhaji pulote Karbi Anglong Autonomous Council (KAAC) lapen Forest asaikhi atum kangtangkring angdeng deng pon nang po. Kali pulote bangso a sekun Dimapur, Guwahati, Kalkatta, Mumbai pen dang-lok  penang-an adim along si le damlap chot po.   

Leave a Reply

Your email address will not be published. Required fields are marked *

January 2012
M T W T F S S
« Dec   Feb »
 1
2345678
9101112131415
16171819202122
23242526272829
3031  
Archives