ADVERTISEMENT

This area is available for advertisement. Please contact for details.

Arnivang
Get Adobe Flash player

Andhra Pradesh government pen Mecca Masjid along areng keso abangphu atum aphan kerap pajirji

Hyderabad:  Kedamtang 12007 aningkan Mecca Masjid along bomb kangbop alam aphuthak  Andhra Pradesh government pen bang 70 areng keso Muslim akhei atum aphan court pen ingsai pon thekthe aprang adai ave a bangphu atum aphan  police atum areng ahu kepaso lapen kachenek  ajok kerap pajirji.
    Andhra government pen kechoche alam klardak pen chini det aphisi kelang nangji kenangsot asai denglo.Lasi State Minorities Welfare asaikam pen government order aloh hangsi Sika.  lakh 70 seh kachelang ponji lapen aningpathe dunji aphan rap dun lo."
    Laso atangka pen, bang 20 atum aphan keso ahir kangtangajok Sika  lakh  3 a bangphutin aphan pajir  ponpo lapen bang 50 atum anutin Sika 20,000 longji pusi ningje. National Minorities Commission (NMC) pensi kapinkhat lo; lapen kerap kapajir a tangka seta labangso adai kave abangphu atum aphan kechenek kaholo sai along kacherap dun police saikhi atum bainong pen kethan dunji aphan bidi-sore pilo.
    2007 aningkan Vosik niphai 18 arni phurkimo kedo Mecca Masjid along Bhomta arnikardom-kardi ahut bomb kangbop ajok adim alongamat bang 9 apran damjui lo. Bomb ingbop det aphi police lapen  khamkhe arat atum angbong kachetengkheng ajok police atum hile ke-ap ajok bang 5 sose acham damlo. Laso alam pen police atum ongdung  Muslim akhei aphan nepingnang ponso lam pabon damsihemkangsam beng laplo. State Minorities Commission aro Fact-finding committee mate ahokpet alam katarlip amai saikhi atum police atum kangnang bangphu aphan chenekpik alam tokjir pen pachini lo.
    Ningkan isi aprang pen court pen kangnang abangphu  atum aphan keloji a hukumpilo lapen ar-eh keklem Hindu asong atum aphan labangso sailangno keklem along kacherap dun a bangphu atum aphan kiri tarlipji  aphan hukum tholo. Chief Minister Kiran Kumar Reddy adai kave arat atum aphan kachenek aphuthak ningduk lapen dia chohang lo.
    National Minorities Commission meiphu Wajahat Habibullah  arideng pen Chief Minister Reddy aphan  tokjir aloh Paipai achiklo palesi NMC kemang ateng pen adai ke-enji aphan hukum hang pilo. Lasi commission adai kedo police officer atum aphan aron ateng pen bisar pondet aphi areng ahu kesoaabangphu atum aphan kacharli angdeng pen lang ponsi  nongnam paklar aphan voreng avarsai pivek nangji pusi than pachini. Majlis-e-Ittehadul Muslimeen (MIM) lapen kaprek Muslim asong atum government  pen kerap pajir nangji pu kemang padolo. MIM songjapo Akbaruddin Owaisi pensi Andhra Assembly along  no-confidence motion aphuthak kachingvai ahutsi lamthe kejai. Laso ahutsi chief minister, prapjin pen kerap pajirji atangka hukum aloh kipiji aphan lamvoi chipi dun lo.

Leave a Reply

Your email address will not be published. Required fields are marked *

December 2011
M T W T F S S
    Jan »
 1234
567891011
12131415161718
19202122232425
262728293031  
Archives