ADVERTISEMENT

This area is available for advertisement. Please contact for details.

Arnivang
Get Adobe Flash player

‘Birta pachetak amai kepha’

Ramsing Ronghang, Dongkamukam:

UPDS-Sorkar angbong kedamtang Phaikuni 25,11,2011 arni Delhi rongsopi  along monsam kapathirthipji apharman ‘MoS’ chetokdet pen aphi Birta ketok atum aphan ‘Congress Meiphu’ press Club ahem along mai kepha, porphai 4:45 apor arni kangsam. Karbi Anglong atok ano kedo birta ketok pherangke atum an Meiphu pen kepha kenangsot amai along birta kelongji aphan chonghong padikhrim aphi meiphu birta ketok atum aphan Congress pen Karbi Anglong arat ale aphan kedeng pon asai alam kejai pangchenglo. ‘Birta ketok jirpo atum ! Karbi Anglong National Congress  pen rat ale aphan kepachunisi kethetan asai  angdeng kedeng pon……..’kaningje papleng longle ako’lam thang dunpet si inut pherangke abang arjulo. ‘Kopi kethetan asai angdenglo Sir …..?’ ‘Matijong 3,2011 arni ke Karbi Anglong arat isi ning karong arni pu kehok pon. Halaso arnike jo pangbeng Melur kekai lapen arki kepangder(bom ke-ap)’ ‘Sir …. laso asai ke-ot ponke  kopi aphan lo ?’ ‘PAPA-ASDC atum kapachethang,UPDS-Sorkar angbong accord chetok tetik thuke KAAC Election ave pusi puthip. Lasi rat kapamanghu-hedetji aphan lapen ASDC-PAPA abinong   jakong kave pu kapeklang ji aphansi netum Phaikuni 3,2011 arni KAAC Election arni kehot Sorkar pen pachethang detlo. Nanglitum kadokave ta ning dojilang tahai , AASU atum 1983  aningkan Assam angkangpi kahuri Election pado nangne puningke Sorkar Election padokok lasi PAPA-ASDC ke kopi abap minsolo pusi mathlo. Sita latum klemthap klemphru pen ajok ‘Langnorem artleng Phakdoihet’ abisarsi kehot tangdet KAAC Election ta pave thudet ajok puthot Karbi Anglong arat pamanghu thuphrong lilo. Lasi, lapuson ajakong jongsi ASDC-PAPA atum aphan thobom pulo tangte Karbi Anglong mo nonphi kangting atovarsi lut rup po . Lasi kapatikuk dunji aphan Congress National Party atumle klem dunde pulote matsi klemjilang ? lasi, Congress jakong do-an chitisi kapavedet KAAC Election Matijong 3, 2011 arni puthot arni kehot (Notification) paklangpo. Lake Karbi Anglong arat aphanke isi ‘big acheivement’ pule pupete pisi pu jilang? UPDS-PAPA-ASDC atum kipuke Accord aphike  KAATC  a Election si pado nangpo lapen State Election Commission pensi laso asai deng nangji pu, sita netum puthot  KAAC a Election HAD mate Ingti Minister pensi pachun detpo. Karbi Anglong arat aphan ko-an ning karong alam ! lake jong-jung alam kali , kapavedet asai puthot kapadothuke.Lasi nelitum a party pen Karbi Anglong adangpi aphan ning karong kachipiji aphan bom kepangder aphanta  asitin arong aphan sika lak ni-ni  pipon tanglo.’ ‘Sir, kapavirdet ason puthot kapadothuke ning karong nangji alam lake ahok. Sir, nangli kaningje pajutje aphrang isi alam karjuji ninghang….’ ‘Kopi alamthe? pu-ik tha!’ ‘Sir,–Karbi Anglong non malom mai-meeting along ASDC atum kapachethangke Congress atum ningkan -40 abat Karbi Anglong charidet aphita khei kethirji aphan lapen rat ale aphan thangnat ta pi thek the. Semsonsing Ingti District vanlo, ASDC ta MoU pen sonthomkep kachari ajakong vanlo UPDS ta MoS pen non son-54 kachari ajakong vanlo sita Congress ke thang nat ta rat aphan pithek the pusi rat ta ningjehurlo laso aputhak nangli pisi puji ?’
    ‘Rat along lapuson alam kapa chethangke pharo angbong pen aphar amatsi kapachobai alam. Nelitum khei lapen rat ale aphan pi piklo, lahaike kalakha pajut un-e. Rat ale aphan kipi ason angbongke, kaphang-ok ahut ador kekom a peh kar-om keron, ador kekom a musuri keron,  ador kekom ahon keron heihui ke rat thek phrong alamlo…. lahaike netum a truck a truck ahum pensi rat ale aphan pibomlo. Lahaike rat ale aphan kalite pilo..?  ador kekom apeh, hon, mosuri netum cherai amatsi cheraire. Kam klem dun longledet seta Job Card ta MAC ahavar tinta pak suri ingkoi-koi rat ale aphan pipon tanglo.     Semsonsing Ingti, ASDC lapen UPDS atum nelitum rat aphan ale kipi ason pipon thek loma ?–karju parlinthu. ‘lasi lapuson kapachethang tap atum aputhak sodak pen pinremlo.’Birta ketok pherangke atum laso acho lapen ardi alamthe bangphutin ta ketok pacherintilo.
    ‘Sir, nanglitum ahin pen rat ale aphan lapu-an Job Card pilo pu chinilo, seta rat along kachethang thuke Job Card abinong abangphu arideng  2005 aningkan pen pini anta ledamdelang ,kam ta long dunde, tangka long dunde, inut-banghini atum arideng chebuihup ajok kam klemkle pin pen tangka chonghu-etsi hor-ok cho-i aret pusi chethang rong. Laso aputhak nangli pisi puji…?’
‘Laheihui alamke ASDC atum tong kapachethang  ma?–Pherangke aphansi karju patinithu.
    ‘Kali Sir, kelong dunde abangphu atum pensi kapachethang’
‘Lake kelongdunde abangphu atum kali, lake Opposition atum kapachethang thap alam, kelongdunde pu atumke kacheparjan thap. Laso alam kachiniji aphan Internet along lang-ik hur tame. Job Card kelong atum, tangka kelong atum amen anta pi-etlo. Sorkar ke kachethang thap alam arjuje Internet along pima kedo lasi dengji.’ ‘Pherangke atum ! neli pen kopine kachiniji mate karjuji ason dolang ma ?
‘Isi alam dolang Sir,–Nokbe abirta a pherangke abang pulo. ‘Pu serak ik tha, kopi alamthelo? ‘Sir, nonhet birta kelongthuke Union Home Minister alam karju amat KAAC Election aphan Matijong 3, 2011 arni, si arni kehot (Notification) aloh paklang ritha pu ajok Assam a Governor ta HAD a file puthot thip-thu phlup pusi birta kelong. Jongsi Home Minister alam karju amat Matijong 3, 2011 arni KAAC Election paklang thekthe det pulote? ‘Lake akimi alam lo’, laso ahut VIP a phone call nangkele ajok halaso arni kangsam pherangke amai pajut koklo.

Leave a Reply

Your email address will not be published. Required fields are marked *

December 2011
M T W T F S S
    Jan »
 1234
567891011
12131415161718
19202122232425
262728293031  
Archives